WINDHOEK Okabinete okwa tegelelwa ka ka popye sha kombinga yoproyeka yosuuka ndjoka ya thanekwa moshitopolwa shaCaprivi omanga inayi tameka niilonga yayo. Oproyeka yOsuuka Liyambezi Sugar Estate omvula ya zi ko okwa li tayi kongo ehangano ndyoka tali vulu okulongela kumwe nalyo moproyeka yosuuka ndjoka yi na uunene wevi lyoohekita omayovi. Kakele molwondando yombiliha yosuuka muuyuni, oshikunino shika itashi ka tsa ashike omuthindo okulonga osuuka, ndele otayi ka longa wo iikulya yiimuna, uuhoho oshowo iilongomwa yi nasha noalukoholi okuza miinima mbyoka hayi zi mosuuka. Amushanga Omukuluntu mUuministeli wIipindi nIikwafambulika, Andrew Ndishishi okwa tseyithile oshifo shika omasiku ga zi ko kutya konima sho omunawino e nasha niikwasuuka sho a tatelele po ehala lyoproyeka omvula ya zi ko okutala ngele omeya nevi otayi opalele okulonga osuuka, opwa ningwa ethaneko ndyoka lya tumwa kokabinete opo ka ninge etokolo. “Otwa gandja iizemo kOkabinete notwe ya tegelela ya popye sha kombinga yaashoka,” Ndishishi ta ti. Oproyeka pethimbo ndika oyi na unene wevi lyoohekita 15 000, nehala ndika otali ka kala nuuthemba wuumwene wevi woomvula 99 tadhi landula. Castro Samunzala, oshilyo sholaata yoproyeka yosuuka ota ti nonando aayambidhidhi yoproyeka okwa li ya hala yi tameke mbala ngaashi tashi vulika, ope na omakatasho gwontumba, ngaashi aapunguli/aagandji yoshimaliwa koproyeka ndjika. Omvula ya zi ko, oproyeka okwa li tayi kongo omuhangani nayo paunangeshefa moproyeka ndjika yokapandi koobiliyuna odhindji moCaprivi, ndjoka kwa tegelelwa yi ka ete po oompito dhiilonga kaantu 7 000. Samunzala ota ti okakomitiye koproyeka yosuuka oka thaneka okukuna epungu oshowo iikunomwa yilwe nelalakano okugongela oshimaliwa omanga ya tegelela aapunguli moproyeka ndjika yi inyenge, ihe inapu longwa sha tango sigo okeluwa ndika. Opwa ningwa omakonakono iikando iyali momumvo 1997 kombinga yoproyeka, oshowo pokati komimvo 2001 – 2002, omapekapeko ngoka ga eta po ethaneko epangelo opo li ye komeho noshikunino shosuuka pEtale Liyambezi. Oproyeka ndjika oya talika ko yimwe yomooproyeka oonene dhoka tadhi lalakanene okulundulula onkalo yuuhupilo moshitopolwa shoka, oshitopolwa shoka pamapekapeko taku tiwa osho oshithigona kaa ku na we muNamibia alishe. Omunawino miikwasuuka a yambukile koBrazil ngoka a talele po moshilongo muJuli 2006 okwa gandja wo omayele pu kale ondjeleka pokati kosuuka niilongomwa yoalukoholo mbyoka hayi zi moomweenge moka hamu longwa osuuka. Oshilongomwa Ethanol shoka hashi zi moomweenge dhosuuka ohashi vulu okumona aalandi nuupu muuyuni, oshoka iilongo pethimbo ndika hjayi longitha omahooli ngoka kaa ge na oholo (unleaded). Ethanol ohayi vulu okulongithwa oyo awike ongomahooli moohindjina dhontumba nenge tayi lumbakanithwa nogasoline okulongithwa koohindjina hadhi longo kopetolola. Iinima iikwawo hayi vulu okuza mosuuka omwa kwatelwa olusheno, uunamiti, oopolisha niikwambapila.