Okakadona keedula 16 oka tambulilwa moshipangelo konima eshi ka kwatwa kokashelu pefimbo kwa li ke li monduda.

Oshiningwanima osha ningwa Etivali komukunda Katwitwi koshitukulwa shaKavango West efimbo lokomatango.

Omupopiliko wopolifi koshitukulwa shaKavango West, Chief Inspector Raimbert Muronga okwa hokolola ta ti nakuninga oshihakanwa oku li monghalo idjuu.

Konima ashike yomafiku ane, natango koshitukulwa shaKavango West okwa lopotwa omulumenhu weedula 33, wedina Moyo Yishime a kwatwa koluvadi, nokufya, pefimbo a li koufita. Dimwe domeengobe daye nado oda fya. 

Omunambelewawiliki koshikondo shetengeneko longhalo yomhepo Odillo Kgobetsi okwa pitifa omukanda kutya moshivike eshi okwa teelela omuloka munenene u na oushelu nomeva efundja.

Okwa kumaida oshiwana opo shi kale sha ngungumana shi li meenduda ngeenge ku na odula i na oushelu nomingungumo shaashi eshi osha nyika oshiponga.

“Ovanhu inava pumbwa okulongifa eengodi dopeke ile va kale mumwe noimuna pefimbo lodula tai loko,” ta ti.

-fhamalwa@nepc.com.na