OSHAKATI – Okilinika yomesho moshipangelo shaShakati oya tulwa oilongifo yomashina oshinanena oo taa ka longifwa mokuhakula omesho, mwa kwatelwa okuyandja omakende. 

Oshi li oshikando shotete koshipangelo kOshakati kwa tulwa oilongifo yoshinanena yokukonakona omesho. 

Minista wouhaku Dr Kalumbi Shangula okwa yandja oilongifo ei pambelewa onghela. 

Shangula okwa ti osha fimana ngeenge ovanhu tava pangwa omesho nokupewa omakende. 

Okwa ti nonande oshikako shaye shokukala minista wouhaku tashi pu ko, ota twikile okuyandja omayele kovakulunhuwiliki koipangelo. 

Ondokotola yomesho, Dr Helena Ndume okwa ti endiki lomesho otali ka eta elunduluko liwa moshiwana molwaashi ovanhu otava ka hakulwa omesho nokupewa omakende. 

“Onda didilika ovanafikola mwa kwatelwa ovakulupe ve na oupyakadi wokumona ko. Ei oyo omhito iwa opo va talele po endiki lomesho va pewe omayakulo,” ta ti. 

Dr Ndume okwa ti ovanafikola ova ninga oihakanwa yokudengwa kovadali ngeenge tava dopa, ashike mboli okaana otashi dulika ke na oupyakadi wokumonako. 

“Ovanafikola vamwe ova taalela eshongo lokumonako koshipelende. Ovadali na ete ovanafikola va ningile omakonakono oudu womesho,” ta ti. 

Okwa weda ta ti ovakulupe ihava dulu va li okutunga oimbale yavo molwashi ka wete ko. 

“Endiki eli ola fimana monooli shaashi ota li yakula ovanhu tava di koitukulwa ya yooloka,” ta ti. 

Dr Ndume okwa kumaida ovanailonga tava ka longela kendiki opo va yakule nawa oshiwana pehe na omunhu ta ningilwa okatongo. 

“Osha fimana ngeenge ovanhu ve teko opo va dule okulonga oilonga yavo efiku keshe ta ti. 

Omunambelewa a kalela po opolongalama yokupanga omesho muAfrica, Naadhira Ndukuya okwa ti opolongalama yavo otai twikile okuyandjaneka omayakulo epango lomesho. 

“Opolongalama ei oya nunimwa okuyandjaneka omayakulo epango lomesho muAfrica. Ohatu twikile nokulongela kumwe nouministeli wouhaku moNamibia,” ta ti. 

fhamalwa@nepc.com.na