Opolifi omoshitukulwa shaHangwena otai konakona oshibofa omo vati okaana kokakadona keedula hetatu ka longelwa omunyonena wopaixulo komatyona keedula 12. Oshiningwanima osha ningwa momwedi Anguste naOkotoba lwoikando ya yooloka kOshikango moshitukulwa shaHangwena.
Omupopiliko wopolifi koshitukulwa shaHangwena, Warrant Andreas Nghiyolwa okwa hokolola ta ti okaana aka okwali haka ka nangala keumbo lamushiinda shavo shaashi omafimbo amwe ina oha ka longa oufiku.
Ota ku hokololwa kutya okaana oha ka nangekwa monduda imwe nokamatyona oko ta ka tamanekwa oshikumungu shekwatonghonga.
Okamatyona okwa li ka kwatwa po nokonima oka mangululwa opo kaye keumbo molwashi eedula daye ina fika okukala modolongo.
Opolifi oya ti okamatyona oka kunghililwa opo ka xulife po okulongela ounona voukadona omunyonena wopaixulo.
Ovadali otava kumaida opo va ha pitikile vali ounona voukadona va nangale monduda imwe nounona voumati.
“Na shikale oshinakuwanifa shomudali keshe opo yandje ehongo kounona vavo unene tuu oumati,” ta ti.
Opolifi oya ti ngeenge okaana ta longelwa omunyonena wopaixulo oha shi piyaneka omadiladilo okaana.
Oshivike sha djako okwa lopotwa okaana keedula hetatu vati ka kwatwa onghongha komufita wongeleka yoshiveva weedula 23.
Oshiningwanima osha ningwa komukunda Onamishu moshikandjohoololo Eengodi, kOshikoto.
Omutamakwa okwa nyenwa omhito yokulifutila mo modolongo konima eshi holoka momhangu yaNdangwa.
Ota ku hokololwa kutya omulumenhu ou okwa ya monduda omo kwa li mwa nangala okaana ndele te ka kwata onghonga.
Omakonakono opolifi otaa twikile moibofa aishe yomakwatonghonga.