Omhangu yaMangestalata mOdangwa oya undulila komesho oshibofa shomusamane womido 41, oo a twa nombele, noku monifa oshiponga okamatyona komido 17 moshitukulwa shaShikoto.

Otaku hokololwa Noa Nghaamwa, a twa kamatyona oko kali take mu hokololifa shaashi a tila inakulu yokamatyona oko otombo. Omunafikola eli mondodo onhi-7, oo edina laye ina li tumbulwa okwa tambulilwa moshipangelo shaNandjokwe.

Oshiningwanima osha ningwa vati mexuliloshivike lopaasha peendingosho di li momukunda Etunda efimbo loufiku.

Omupopiliko wopolifi moshitukulwa shaShikoto, Senior Inspector Linea Heita okwa hokolola ta ti okamatyona oko vati oka ka hokololifa Nghaamwa shaashi vati a tila inakulu yokamatyona oko otombo.

Vati eshi osha dilila peenhangu pokati kainakulu yokamatyona naNghaamwa molwaashi e na eendjo domukulupe doN$36-00.

Kamatyona eshi vati a uda ehokololo lainakulu a tilwa otombo okwa ya keendingosho ndele ta ka pula Nghaamwa kutya omolwashike kwa li ta tangunifa noku tila inakulu otombo.

Okamatyona vati oka dja ko nee taka kokolola Nghaamwa, kemu yukifa kondingosho ya inakulu. Manga tava ende, vati o Nghaamwa okwa kufa mo ombele, noku twa kamatyona mevele lokolumosho.

Kamatyona okwa dja po tai oshidiidi a yuka kokamba yainakulu, ashike okwe ongotela manga ina fika ko. 

Omufekelwa okwa faduka po nokonima okwa tatawa kovakwashiwana fiyo ta kwatwa.

Nghaamwa ota pangulilwa oshibofa shonghendabala yedipao, noshibofa shaye osha undulilwa komafiku 19 Auguste 2025.

– fhamalwa@nepc.com.na