Okamatyona keedula 17 oka kwatwa po konima eshi vati ka kwata omukulupe onghonga weedula 75.
Oshiningwanima osha ningwa Omaandaxa modoolopa Keetmanshoop efimbo lokomatango.
Omukulunhu koshikondo shokukonakona oimbuluma wopolifi moKaras omupedukomufala Nicodemus Mbango okwa hokolola ta ti omukulupe okwa hangika ta kongo oikuni moixwa pefimbo loshiningwanima.
Okudja opo vati okamatyona oka nhukila omukulupe noku mu dula oikutu ndele ta ka i naye moixulo.
Opolifi oya hokolola tai ti konima omukulupe eshi a longelwa omunyonena wopaixulo okwa dja po ta kwena ina djala oikutu. Ovakwashiwana ova ningila omukulupe omapulapulo nokonima ova shivifila opolifi.
Opolifi oya landula eemhadi domufekelwa okudja ponhele opo fiyo okeumbo oku haku di okamatyona noku ka kwatwa po.
Opolifi oya hokolola tai ti omufekelwa nomukulupe aveshe ova twalwa koshipangelo opo va ka ningilwe omakonakono opaunamiti.
Elalakano lomakonakono opaunamiti opo ku talike ngeenge omufekelwa oye tuu shili a ya moixulo nomukulupe.
Okamatyona otaka holoka momhangu yaKeetmanshoop nena notaka pangulilwa oshibofa shekwatonghonga.
fhamalwa@nepc.com,na