OSHAKATI – Elelo lyondoolopa lyOshakati olya tseyithile aakalimo ayehe yomolukanda Okandjengedi Uumbangalantu, oshitopolwa shotango noshitiyali mOshakati, kutya okwa tamekwa noshikonga shokutula omagumbo nomahala melandulathano ngaashi okaalita ka tendwa.
Omunambelewawiliki Timoteus Namwandi okwa ti oshikonga shoka otashi tameke nena momasiku gatano gaMaalitsa, sigo oshikonga tashi ka pwa.
“Aanambelewa yelelo lyondoolopa oshowo mboka taya kwathele po kathimbo otaya tameke okukonga uutenda woopolota okuza nena pethimbo lyoowili dhiilonga,” ta popi ngaaka.
Ta ti, komauyelele galwe ga gwedhwa po, naku kwatwathane nombelewa yelelo lyondoolopa konomola yongodhi 065-229 500 nenge nomunashipundi go-LADC, David Martin. Omukuluntu nomupitithi gwomauyelele melelo lyondoolopa lyaShakati Katarina Kamari okwa ti, omalukanda agehe mOshakati inaga kala ge na oopolota dhi na uumwene wevi.
“Otwa ipyakidhila okuyambula po omalukanda mOshakati, oku ga tula poondondo dhopandoolopa,” ta fatulula ngaaka. Ta ti, aakalimo yomomalukanda Evululuko paife oya pewa epitikilo oku ka ninga omayindilo gokupewa oondokumende yuumwene wevi.
“Eyindilo ohali ningwa uuna mwene gopolota a futu N$30 mo square meter, okumona ondokumente yehala lye,” ta ti ngaaka.
Kamari okwa fatulula kutya ngaashi ehumokomeho lyu uka komeho nolya fuma ko, ondokumente ndjoka oya simana kukehe omukalimo a kale e yi na, oku mu yambidhidha noompumbwe dha yooloka monakuyiwa.
“Otwa li twa ndhindhilike kutya otwa kala nokuyambula po ondoolopa yaShakati komahala hoka ku na aantu ye na iiyemo yi li nawa oshowo iiyemo yi li hwepo,” ta popi ngaaka.
Ta ti, sho shoka ya kutha onkatu ya yambidhidhe oshowo ya yambule po omahala hoka ku na mboka ye na iiyemo yi li pevi lela nenge kaaye na iiyemo yasha.
Ta popi ta ti, shika natango oye shi ningile ombinga yimwe yUupindi ndjoka ya pwa nale.
Ta gwedha po ta ti, oye li momusholondondo, onkene ke shi olukanda mOshakati otali ka mona omauwanawa oshowo eyambulepo, nokutulwa pamuthika gopandoolopa. -vkaapanda@nepc.com.na