Victoria Kaapanda
Oh, onduuvu ashike kwa ti “Boom” no shinima tashi kookoloka kohi yohauto, nani okamati kandje kapumwa kohauto. Ndhoka odha li dha popiwa ku he yokanona kokamati Simon Tangomwene Hamunyela (7) komondondo yotango, hoka ka li ka pumwa kohauto yoFord Ranger nokusa posikola yawo Charles Anderson mOngwediva.
Oshiningwanima shoka okwa li sha holoka moshanga shomutenya, konima osikola ya pita mo. Okanona haka nooyakwao oya adhika owala ya ilwa ko kosikola kuhe sho oshiponga sha ningwa. She ikolela ku Toivo Hamunyela, he yokanona, sho a thiki posikola, okanona ke opamwe naukwao oya londo mohauto. Ashike ye (he) okwa kwatwa kenota ndjoka lye mu thiminike opo a ka konge omeya molugumbo lwosikola. “Omanga inaandi thika po pomba yomeya, onduuvu ashike oshinima sha inyenga, sho tashi kookololwa kohi yohauto, nani okanona kandje,” ta popi nomahodhi taga mbomboloka. Ta ti, mokushuna okwa li a tsakanekwa kuunona wosikola tau tondoka tau igidha kutya Tanga a lyatwa.
“Onda li nda kambadhala ashihe te vulu, ihe kakwa li ndina sho te vulu okuninga, omumati gwandje ayi nale,” ta hokolola ngaaka. Aakuluntu ya li posikola mpoka oya popi kutya ohauto ndyoka okwa li tayi hingililwa. “Oshike iihauto yi na okuhingililwa mokati kaanona, mpaka oposikola,” taya nyenyeta. Taya ti, uunona mboka a ngala wu lyatwe uyali, ihe kamwe oka li ka tondoka etaka piti.
“Uunona mboka okwa li wa zi mohauto wukalande omahayisa pegumbo lya taalelathana nosikola. Ohauto ndyoka okwa li tayi hingwa okuza kuuninginino ya taalela kuuzilo, sho ya pumu okanona hoka,” omuvali gumwe ta popi ngaaka. Kundana moonkundathana nopolisi ndyoka ya li poshiningwanima oya kumagidha aahingi yoohauto ya kale aluhe taya hingi nuukeka, unene ngele taya thiki pomahala ge na uunona wosikola.
“Ndika ethano ta li ulike kutya ohauto ndyoka okwa li tayi hingiliwa, oshoka ngeno omuhingi okwa vula okupangela ohauto etayi kankama,” taya nyenyeta ngaaka. Omukuluntusikola gwosikola Charles Anderson Festus Himalwa okwa ti omuhingi ka kwa li ta hingi nayi, ye ka kwa li tahingilile.
“Omapopyo ngoka ka geshi goshili, okanona oka pumwa ashike, shoka oshiponga ashike sha holoka,” ta ti ngaaka. Himalwa ta ti, oshiponga shika oshi nyanyaleka, osha holoka unene miipathi yaanansikola aakwawo oshowo yomukuluntu gokanona. “Kape na omuntu ta hala okuhingilila mokati kuunona nomehala ndika. Shoka oshiponga ashike, ihe inashi ningilwa owina. Okanona okwa li taka piti opate sho kiidhenge mohauto, ihe omuhingi ka kwa li eka mono,”ta hokolola ngaaka.
Omugandji gomauyelele moshitopolwa shaShana Frieda Shikole okwa ti, omuhingi ngoka okwa li a mangwa po kopolisi etaka ethwa konima yethimbo. –
vkaapanda@nepc.com.na