“Inda! Inda! Za po pungame, owa hala shike? Inandi hala okuya kegumbo.”
Okanona kokamati komimvo heyali osho ka li ka tidha omutoolinkundana ngaaka, omanga taka longekidha omapakete ka lale pooha nendoloma lyiiyagaya mOshakati, popepi nomatungo omanene gaGame nEtango.
Nonando opwa li pe na iiti tayi teka esiku ndyoka, kemanya kwa kaza ngaa ontsi.
Okanona hoka oka li ka makuka edhina lyako kutya oko Timo.
Uutalala wa ningi esiku tawu kugwa oshilongo ashihe, itawu indhindhimikilwa komuntu inaa zala ombindja nenge keena ekumbatha lyokwiisikila.
“Ehala ndika ondi li hole oshoka opo handi mono okulya kwandje. Sho aantu taya ekelehi iikulya mbyoka inaaya hala nenge uuna aayendanandjila taya tulile ndje mo shoka ye na po,” ta fatulula ngaaka. Ta ti, omapekete ogo ha ningi iinguma ye, iikutu mbyoka a zala kolutu, omuzalo gwa kehe esiku, ta popi ye ta ulike iitapa ya mangwa noondhalate.
“Onda thigi po osikola omumvo gwa yi opo ndi nyange shokulya oshowo omizalo dhandje. Kegumbo ohandi yi ko omapitathimbo oshoka itandi tsama ko oku na ondjala, mpaka ndi li, ope li hwepo,’’ ta popi ngaaka.
Okanona hoka oka li ka hokolola kutya onkalo kegumbo oya nyayika, ta popi ta ti, ngele oka fala ko omuntu kape na ngoka ta tsama ko.
“Kegumbo inandi tidhwa ko, ashike onkalo oyo ya tidhi ndje megumbo. Otandi kala tandi ningi shike megumbo ngele kamu na shokulya, ondi na okuya ndi ka tale mpa tandi mono sha shokulya,” ta popi ngaaka.
Timo okwa ti, aakuluntu ye ayehe oko ye li.
MOshakati oha zi nahe, molukanda Ankambya.
Ta ti, he ngele e mu mono okelago, oshoka naye megumbo iha kala mo, kehe gumwe nondjila ye, omanga yina anuwa oku li kOshikango, moshitopolwa shaHangwena.
‘’Osikola onde yi thigi po omumvo gwa yi. Onde yi thigi po owala nonando itandi vulu okuya muule kutya onde yi thigi po molwashike. Kandi na ohokwe yokushuna kosikola nando,” ta popi ye ta manga iipakete ye.
Omanga ta hokolola, opwe ya ongundu yaAngola okuza pomimvo ntano sigo oomeme yomimvo tadhi tengenekwa 25 taya kekama kuutalala ya hala omapakete ya ka huhulukwe omulilo.
Shoka okwa li sha geyitha Timo, ta ti, aantu mboka aluhe oh aye ya taya kutha po iinguma ye, taye ke yi tema po omililo.
Timo okwa li a pula omakwatho moshigwana, kukehe ngoka ta vulu okuyambidhidha nomakumbatha omakulu nenge iikutu iikulu.
Omupopiliko muuministeli wuukashikekookantu Lukas Haufiku okwa ti, ombelewa yawo inayi tseya kombinga yokanona hoka. “Poompito odhindji aanona yamwe haya lala momapandaanda, oye na omalukalwa ihe momagumbo inaya hala mo,” ta popi ngaaka.
Magano Kalimba gwomuuministeli wokashikekookantu mOngwediva okwa ti, ohaya yambidhidha aanona ya taalela omaupyakadhi goludhi ndoka.
Ta ti, ohaya longo nuupu uuna ya lopotelwa mpoka pe na aanona ye li momapandaanda ya ye po, yo ya vule okugandja omakwatho ga pumbiwa.
“Otu na egumbo lyoothigwa oshowo aanona kaayeli mesiloshimpwiyu, hoka hatu ya fala oshowo oku ya tamekitha osikola,’’ ta fatulula ngaaka.
– vkaapanda@nepc.com.na