ENDOLA – Aakwanezimo yokanona komimvo ndatu Gotthard Ndazinale yaPetrus oye li monkalo yu udha omapulu sho anuwa okanona hoka ka dhipagelwa kuhekulu gwokoohe moAngola.

Yina yokanona hoka Lucia Matheus okwa hokolola kutya okanona ke okwe ki ihulu ka li ka katalela po koohe komukunda Ondobe yElao kOkalongo moNamibia, ashike onkundana ndjoka ya ka landula etalelepo ndyoka oye mu halutha noonkondo.

“Anuwa sho ka yi kOkalongo oka falwa ka ka talele po yinakulu omumwayina gwayinakulu ngoka a vala he, koAngola, ko oko ka shipagwela, ihe sho ka yi inandi tseyithilwa. Ethimbo alihe otandi ti ashike okanona oke li kOkalongo,” ta hokolola ngaaka.

Ta ti, uuyelele a pewa, anuwa okanona oka li pamwe nokakwawo komimvo hamano ka valwa komusamane ngoka a hombola yinakulu omumwayina gwayinakulu. Omusamane ngoka anuwa oye e ka kutula omuligu.

“Inandi vula okutala omumati gwandje lwahugunina oshoka ethano ewinayi. Onda adha gwa ekama, ndafa nda tala oshikombo sha dhipagwa,” yina yokanona Matheus ta hokolola nomahodhi taga pononoka koompanda.

Ta ti, okwa hala okuuva kutya okanona ke kokamati oka dhipagelwa shike, noka dhipagwa ngiini.

Omusamane ngoka anuwa okwa adha uunona tawu ya megumbo pethimbo naye ta zi kuundingosho. 

Anuwa okwe wu nyenyetele kutya inau za mo we megumbo, noku u mbandameka kutya ote u tete omilugu.

“Anuwa okwa kwata tango okanona ke, hoka komimvo hamano, te ka tenteke ombele pothingo nelalakano lyoku ka teta omuligu. Okanona hoka oshoka okakuluntu oke shi pondola okumatuka po,” ta hokolola ngaaka.

Matheus ta ti, okanona ke oshoka oke na ashike oomvula ndatu, inaka vula okumatuka po, oka kwatwa e taka tetwa omuligu,” ta po pi neyeme.

Ta gwedha po ta ti, okanona ke kokankelo okwa li e shi otaka kala omunashilonga monakuyiwa, ihe nena okwe ka kuthwa miipundjamenye.

“Omutekulu gwandje muka okwa zi mo a yi kOkalongo, ihe okwa ka sila koAngola, ngiini? Otwa hala okupewa ehokololo lya yela kutya omutekulu gwandje okwa dhipagelwa shike?” hekulu yokanona Petrus Kafita ta pula.

Kafita okwa gwedha po kutya ope na oohapu tadhi popiwa kutya omulumentu ngoka okwa li a pundula okathindi, nokwa li a adha iikulya ye ya liwa mo sho a zi kookamba, notaku fekelwa kutya  oshe mu geyitha opo a longe iilonga ya tya ngaaka.

Omumwayinagona gwaMatheus, Rauna Kafita okwa ti, oya kanitha omumati gwawo kaape na ehokololo lyongushu.

“Ehokololo ekwao ndyoka twa uvu, omusamane ngoka okwa li ta dhana naanona ashike, ihe ine shi ningila owina. Shoka katu shi uvite ko, otwa hala ehokololo lyi ihwa po,” ta  ti ngaaka.

Ta gwedha po ta ti, sho ya ka tala ko omudhimba, oya ulukilwa uuyelele awuhe kutya omusamane ngoka okwa mangwa po kopolisi yaAngola, okwa falwa kondholongo kOkapeu-peu.

Okanona oka fumbikwa mehuliloshiwike.

-vkaapanda@nepc.com.na