Opolisi moshitopolwa shaMusati otayi konaakona oshipotha moka okanona komimvo 13 anuwa ka kwatwa koonkondo nokupewa etegelelo komulumentu gwopuushiinda. Oshiningwanima shoka anuwa osha holoka momukunda Omadhiya momundhingoloko Onesi.
Sha ikolelela komukuluntu gwopolisi moshitopolwa shaMusati Ismael Basson, okanona hoka anuwa oka li ka kwatwa koonkondo pokati komwedhi Kotomba oshowo Novomba omumvo gwa yi.
Opolisi inayi hokolola kutya okanona hoka oka li ka kwatwa koonkondo ngiini.
Nakufekelwa anuwa omushiinda e na omimvo 29, ihe ina kwatwa po natango.
Oshiningwanima shoka osha holoka ashike omasiku omashona, sho okanona komimvo 12 ka pewa natango etegelelo komuhingi gwotakisa koWindhoek molukanda Okandja Park. Otaku hokololwa kutya omulumentu ngoka a kala ta longele uunona womimvo dhi thike mpoka iilonga ya tya ngaaka, okwa kala anuwa noku wu mbandameka kutya ote wu dhipaga ngele we shi popi.
Omumvo gwa zi ko natango oshifo shaNew Era okwa li sha lopota okanona komimvo 13 hoka ka li ka si sho ka kala nokukwatwa koonkondo kuhe, momukunda Olukula moshitopolwa shaHangwena.
Otaku hokololwa kutya okanona hoka oka li ku ulike omandhindhiliko gomukithi goHIV/Aids, nonando kakwa li ka ningilwa omakonaakono gomukithi ngoka.
Yina yokanona hoka anuwa okwa kala nokugamena omusamane gwe ngoka sigo onena inaa kwatwa po.
Oshiningwanima shoka okwa li sha etwa puuyelele kugumwe gwomaakalimo yomomukunda moka, konima a li a dhimbulula kutya kakwa li pwa katukwa onkatu.
Uupyakadhi waanona taya kwatwa koonkondo, unene kaapambele yawo oshowo kaantu yeshiwike okwa li wa nyenyetwa kopolisi oshowo komalelo gopamuthigululwakalo, sho tau indjipala.
Opolisi okwa li ya popi kutya oya taalela uupyakadhi wiipotha yaanona taya kwatwa koonkondo kaantu ye shiwike, ihe omakwatokoonkondo ngoka ohaga lopotwa kwa toka omanga yimwe ihaayi lopotwa nando, okugamena aapambele mboka ye shi ningi. Omukuluntu gwopolisi moshitopolwa shaShikoto Teopoline Kalompo-Nashikaku okwa ti kehe ngoka ta ka gamena omukwanezimo gwe sho a longo iilongo ya tya ngaaka otaka patululilwa oshipotha she she mu ukilila.
“Aavali oshowo aakuluntu momagumbo naya hulithe po okugamena oshowo okuholeka aantu taya kwata aanona momagumbo koonkondo. Aantu naya lopotwe kuyele opo ya vule okukatukilwa onkatu,” ta kumagidha ngaaka.
vkaapanda@nepc.com.na