OSHAKATI – Aatali yetanga lyokoompadhi komasiku gokomeho itaya kapya we omutenya nokumona iihuna sho taya ka etelwa po uutala kelelo lyondoolopa lyOshakati.

Mayola gwondoolopa yaShakati Leonard Hango okwa ti, oproyeka ndjoka otayi tulwa miilonga momasiku ga taalelwa.

“Shika otwe shi ningi oshoka okapale hoka oke li paife kohi yelelo lyondoolopa yaShakati, onkene otse tu na oku ka sila oshimpwiyu,” ta fatulula ngaaka.

Hango okwa ti oya ndhindhilike kutya aaholi yetanga olundji ohaya kala ya thikama mokati komutenya uuna taya tala etanga.

Malakia Pendapala omuholi gwetanga okwa ti, shoka tashi tengenekwa kelelo lyondoolopa lyOshakati otashi ka eta elunduluko oshoka oyendji oya kala haya sholola oku ka tala etanga kEmbandu oshoka oku na omutenya.

“Oshigwana ohashi hilwa pehala unene uu na p ena omayakulo omawanawa. Ngele kEmbandu okwa kala ku na omuzile oshigwana oshindji ota shi ka kala hashi ka tala etanga ngele ku na omaudhano,” ta popi ngaaka.

Pendapala okwa ti olundji oto adha oshigwana oshindji tashi tondokele kokapale kemanguluko kaShakati oshoka oke na omuzile gwa gwana.

Aanangeshefa yopEmbandu oya yambidhidha onkundana ndjoka taya ti shoka otashi ka eta wo ookasitoma pomahala gawo oshoka ngele ku na omaudhano nayo otaya kala haya landitha.

“Oyendji otaya ka holoka oshoka oye shi kutya oye na mpoka taya ka gondja, nongele ya mana okutala etanga, otaya kala taye ya oku tu sapota,” taya popi ngaaka.

Okapale kEmbandu oka kala ethimbo kaake na ehala lyomuzile nenge mpoka hapu kuutumbwa.

Oshiwike sha zi ko natango elelo lyondoolopa lyaShakati okwa li lya tsike omite dhomizile pokapale kEmbandu.

-vkaapanda@nepc.com.na