OKAMWANDI – Omupeviminista gwelongo nomaudhano Dino Ballotti mehuliloshiwike okwa patulula pambelewa okapale komaudhauno komukunda Okamwandi moshitopolwa shaShana.

Okamwandi oke li ookilometa 10 okuza mOshakati mondjila yo kuya kOshikuku. Okapale hoka okeli oomita tadhi tengenekwa 500 okuza kopate no keli natango metifa okulongwa kapwe. Okena omahala goku zalelwa uundjugo, oombelewa oshowo okapale komaudhano gomokambamba.

Ballotti esiku ndyoka okwa pandula omupresidente gwoNFA  Robert Shimooshili sho a fala ehumokomeho momukunda, ta ti shoka a longo osha simana noonkondo.

“Omaundhano oga simana sho shoka wu wete engathithi lya thiki nena mpaka omolwa omaudhano,” ta popi ngaaka.

Ta ti okapale hoka okalongwa nawa no taka nyanyukitha onkene epangelo otali ka yambindhidha mpoka tali vulu,” ta ti ngaaka.

Omupresidente gwoNFA Shimooshili esiku ndyoka okwa popi kutya okapale hoka otaka katulwa ponkatu mpoka taka vulu okudhanenwa omaudhano agehe. 

“Otwali twa mono ompumbwe yehala lyomaudhano sho shoka kwali tweya po nendhilandhilo lyokuya po nokapale haka,” ta ti ngaaka. 

Omugandjigomauyelele gokomitiye yokuya po nokapale Ikolelela Ekandjo okwa ti okapale hoka oka etwa okuxwaxwameka omaudhano.

“Okapale haka ina ka pwa natango, onkene otuli metifa okukalonga opo kathike ponkatu yokudhanenwa omaudhano omanene,” ta ti ngaaka. Ta ti, okapale hoka oka etwa po koshigwana shoka shali sha manga oonyala kumwe nokugongela oshimaliwa shoka sha longo ngaaka.

Mehuulilo shiwike okwa dhanwa omaudhano getanga lyokompandhi geli 32, ngoka kwali taga kondjele oshimaliwa N$160 000.

Oosipana dha yooloka dha za kiitopolwa ya yooloka moshilongo odhali dha kutha ombinga.

Elenga enene lyUukwambi Herman Ndilimani Iipumbu esiku ndyoka okwali a pandula ayehe mboka yali yambindhindha opo okapale hoka kathikame po ngaaka.

“Shika mwa longo mpaka otashi nyanyudha, onkene otandi mu pandula oshoka aanyasha oya mono ehela lyoku ya kutha uuza noku ya nyanyudha,” ta pandula ngaaka.

ˆvkaapanda@nepc.com.na