Omaupyakandhi gokwaamona uuhaku wiihwapo pethimbo momukunda Gcaruha moshitopolwa shaKavango West oweya pehuulilo sho kwa patululwa okakilinika oshiwike shika.
Aakalimo yomoGcaruha oya kala noku e nda iinano iile taya ka mona uuhaku kokule oshoka oya kala omimvo dha thika 11 nokapangelo itaaka longo.
Minista guuhaku nonkalo nawa Kalumbi Shangula sho ta patulula okakilinika hoka okwa ti, okueegulula omiyelo hoka okwa indjipaleke omayakulo gopauhaku moshitopolwa.
“Aakalimo itaya ende we oondjila oonde nokulongitha oshimaliwa oshindji okukamona uuhaku, shoka tashi ya yambindhindha poompito odhindji,’’ ta fatulula ngaaka.
Shangula okwa gwedha po ta ti, nonando okakilinika hoka ka kwata ethimbo ele okupwa okulongwa, aapangi oya kala taya gandja omayakulo okuza komagumbo.
Ta ti kutya omakulo guuhaku oga simana oshoka ohaku kaleke po uundjolowele waantu.
“Epangelo olya kala no tali tsikile okulongela oshilongo shalyo uuwanawa oshowo okugwanitha po oompumbwe dhoshigwana,” Shangula ta ti ngaaka.
Ta ti, ehumokomeho otali ende lyu uka komeho, nomauwanawa otaga ende taga thiki po pepi.
Shangula okwa ti, shoka otashi ulike iiyimati yepangelo oshowo ohokwe nolukeno epangelo li na noshigwana shalyo.
Okwa gwedha po ta ti shoka inashi ningwa ashike moshitopolwa moka ihe osha ningwa notashi tsikilwa okuningwa oshilongo ashihe.
“Epango olya simana. Onkene oshigwana oshi na okugwanithilwa po oompumbwe ndhoka tadhi pumbiwa, okukaleka po omaundjolowele gawo,” ta ti ngaaka.
Aakalimo moshitopolwa moka oya pandula epangelo sho lye ya yambidhidha ngaaka, taya ti okakilinika otaka ka yambindhindha oyendji.