Kae Maṱunḓu-Tjiparuro
Mberi kohonga yomazikamisiro yOmahetjo, mavetja okapapu make yendayenda.
Omahetjo orutu rovaṱuta womahi wakangamwa, va Maheke na Tjozondjupa ndu nondando yokukondja okuweza onḓengu kovinamuinyo mokuvikurisa ngunda avi hi ya randisiwa. Kutja ongaro ndji ri po nai yokurandisa ozondanaukiro, tjazumba ovezerande nḓu ve kekurisa ngunda ave hi ya kapitisa kotjitamba tjomarandero kutja ze yenene okunana opereisa yokombanda. Mu nao okutuurungira mOmahetjo, ndu maru kuramene po Omaheke na Tjozondjupa, otji va tanda okuisapo ovandu imba vopokati mbe randa ozondana nokukezekurisa posi ya nambano oveni ve ze kurise tjazumba ve ze hungamise otjitamba tjomarandero oveni nani opereisa mai rire ombwa tjinene. Okapapu nai ke ri pokutja Omahetjo ya tjita omaningiriro komuriro kOtjirata tjOnyama tja Namibia kutja ozondana nḓu maze yandjwa i yovaṱuta va Maheke na Tjozondjupa kutja ze tji kurise ze tjiukwe nawa kutja ozauṋe nu ze ri kehi yondjeverero yaune. Otja komazuvira o patji pa toko tjandje omuriro Omahetjo ye u munu. Otjo tji matji yandjere kutja nambano otjiungura tjayo tji kare nomuhunga nu tji sembame. Otja ku vo kape ya omba kaparukaze ovaṱuta varwe, tjimuna ova Rongo, nu tjinene ova Matjete, okurikwamba kongondjero ndji. Oyo nai ngunda ndja ombozorwa i yOmaheke na Tjozondjupa nu ku ku ri okuwombozora uriri ku ku he ri kutja opuwo ongondjero ndji mai handere potukondwa atuyevari hwi uriri.
Mu nao ovaṱuta varwe otji va sere okukara noupupurukwe pu va zuu ozombongarero nḓa tjama nondunge ndji okukondja okukara po poo nandarire wina tji ve nonyota na yo okuṋanga Omahetjo okuvasa ku vo okukevehandjaurira nokukevezuvisa ondunge nondando ndji.