Aanafalama oyendji miitopolwa yokonooli oya thigwa pomutenya kokapuka hoka ke li momapya gawo ngashiingeyi.
Yamwe otaya lili kutya omanga okapuka taka hanagula iilya kombinga yimwe, ombinga yimwe oyili momeya sho efundja lya thiki momapya gawo.
Kansela goshikandjohogololo Onesi Festus Petrus okwa ti okapuka oka lya iilya shi nyanyaleka moshitopolwa shawo.
Ta ti okwa kala nokulopotelwa kaakalimo kutya okapuka otaka hanagula iilya yawo shoka a li e shi lopota kuuministeli wuunamapya.
“Otwa kala nokuandjaneka omauyelele moshigwana opo mboka ya ponokelwa kokapuka ye shi lopote, yo aanambelewa ya ka tsinine omapya gawo,” ta popi ngaaka.
Petrus okwa kumagidha wo oshigwana shi longithe omukalo omukulu gokulikola okapuka, oshoka nago otagu kwathele.
Ta ti, okapuka itaka lopotwa ashike moshikandjohogololo shawo ihe nokiitopolwa yilwe konooli.
Ruth Amukoto gwomomukunda Omadhiya okwa ti epya lyawo olya lika po kokapuka, omanga iilya kombinga yimwe yi li momeya.
“Koshilya shimwe otwa adha kwa papata uupuka nande 10, ihe nando natu likole kashi ivule,” ta ti ngaaka.
Selma Pinihas gwomokunda Ehafo lyaKandenge okwa ti okapuka oke ya thigi yaa na iilya, nonando omo ke li natango momapya.
Ta ti, okwa li a longo epya lye kuyele, nelalakano a mone iilya iiwananwa oshoka omvula oya loko nawa, ihe nani kashi ivule, iilya oye ya ashike yi kokotwe po kokapuka.
“Epya lyandje ngaashi wu li wete ngaaka, onda li nde lyi lima lya pwa ko thilu. Tandi li kunu ombuto ombwaanawa lela nolya menene nawa, ashike ombaadhilila omwi iteyele okapuka haka nokulya po iilya yandje ayihe thiluthilu ngaashi wu shi wete ngawo,” Pinihas ta popi neyeme ngaaka.
Ta gwedha po ta ti okwa li e na omukumo kutya nuumvo otamu zi iilya iihwepo tayi vulu okupungulwa, ihe nani hasho ya thikile momakana gokapuka.
Pinihas ndhoka okwe dhi lombwele Kundana Etiyali sho a li ta kwashiilipaleke nkene okapuka ka lya omapya gamwepo.
Matias Thomas gomomukunda Othingo okwa ti, okapuka oka ponokele omapya ogendji momukunda gwawo.
Ta ti, sho a yi mepya ee ta ningi omapekapeko, oke li mo taka yalulwa, mbela kamwe oka hita nale mevi oshoka oka li okendji lela.
Leo Simon nomukulukadhi gweSoini Simon mboka ya li ya piti ongula yEtiyali taya longo mepya oya ti okapuka oka yonagula po epya lyawo thiluthilu, taya ti itamu vulu nokuza nando olata yimwe yiilya, onkene oye na okupulula nokukunununa epya lyawo natango omanga omvula inayi sheka.
Simon okwa ti okapuka hako oshikando shako shotango taka ponokele epya lyawo.
Okapuka oka kala mo oshiwike shimwe mepya lyawo ihe uunambo kaye shi kutya oka yi peni, taya ti mbela oka hita mevi oshoka kamu na nando okamwe kamwe mepya lyawo.
“Okapuka sho ka li ke tu lulile okwa li twa ningi onkambadhala yokutha omukanka kooha dhepya alihe, opo ngele ka hala okupita ke ye mepya okuza miihwa, otaka gwile momukanka,
Ashike nonande omukanka gwa kwathele ngaa wumwe wu gwile mo, ethimbo ndyoka okwa li wa ponekela nale epya.
Soini okwa ti, okapuka oka li ka mana ko epya lyawo.
Anuwa okwa kala nokulikola ashike okapuka, ta ti pamwe tawu pu mo ihe inashi kwatha sha.
Kundana sho a li a tala omapya ngoka ga li ga ponokelwa kokapuka hoka taka popiwa, ko taka nyenyetwa kaanafalama, oka hanagula po iilya momapya lela.
Omugandji gomauyelele muministeli wuunamapya Simon Nghipandulwa okwa ti, okapuka oka hanagula omapya goyendji konooli.
“Uuministeli owa ilongekidha okutsinina omapya ge na okapuka niipuka iikwawo miitopolwa ayihe,” ta ti ngaaka.
Ta kumagidha oshigwana shi lopotele ookansela osho wo aanambelewa yawo miitopolwa yawo opo ya yambidhidhwe mbala.
-vkaapanda@nepc.com.na