Charles Ndeumane
OKATYALI – Aakalimo yomoshikandjohogololo shaKatyali moshitoplwa shaShana oya gongala mOlyomakaya oshiwike sha zi ko ya tyapule epatululo lyosasiyona yopolisi yawo ndjoka ya patululwa pambelewa kukakukutu gwetanga lyopolisi yaNambia Joseph Shimweelao Shikongo.
Shikongo okwa ti epatululo lyombelewa ndjoka onkatu ya simana mokwaadha iilalakanenwa yetanga lyopolisi yaNambia. “MOkatyali omwa ndhidhilikwa unene iimbuluma ngaashi omahepeko guukashikekookantu, uufuthi wiimuna osho wo omadhengathano,” Shikongo ta ti.
Shikongo okwa kumagidha oshigwana shi hangane mokukondjitha iimbuluma. “Ngele owa landa iinima ya yakwa etumwalaka to gandja kaafuthi olyo ndyoka kutya iinima mbika to landitha mpaka otwe yi panda, ka tale ishewe,” osho Shikongo a popi ngaaka.
Osasiyona ndjoka ompe oshowo ohauto yobaki ompe ndjoka ya pewa opolisi yaKatyali oya kotha oshimaliwa shi vule poomiloya N$5. Oomvula dha piti opolisi yaKatyali oya kala hayi longele momatungo ngoka ya li ya iyambelwa kukansela gwoshikandjohogololo shaKatyali Joseph Mupetami.
Omukwaniilwa gwOndonga Fillemon Shuumbwa Nangolo okwa indile ooyene yomagumbo nooyene yomikunda ya longele kumwe nopolisi mokukondjitha iimbuluma. “Opolisi oyo ndjoka, ooyene yomikunda lopoteni iimbuluma tayi inyenge momikunda dheni. Iimbuluma kayi na kutya oya longwa koolye, nande okanona kaandjeni ka yona na ka lopotewe ashike,” osho Shuumbwa a ti.
Ngoloneya gwoshitopolwa shaShana Elia Irimari okwa tumbaleke iilonga yopolisi mokutunga po osasiyona ndjoka. “Nena itatu patulula ashike omiyelo dhosasiyona yopolisi ompe ashike otatu patulula omiyelo dhetulomiilonga lyoveta negameno lyoshingwa,” Irimari a ti.
Ngoloneya gwoshitopolwa shaHangwena ngoka a li nale kakukutu gwetanga lyopolisi General Sebastian Ndeitunga okwa pandula Shikongo sho ta tula miilonga omathaneko gopolisi ngoka aakuluntu yopolisi aakulu ya nyengwa okutula miilonga. “Onda hala okupandula omukuluntu gwetanga lyopolisi yaNambia Joseph Shimweelao Shikongo molweitulemo lye miilonga, kapu na iilonga ya simana yi vule okutsukila mpoka pwa hulile mboka ya zi ko konima yoye,” osho Ndeitunga a ti.