ENGELA- MOkila koshipangelo shaNgela ka i na vali onhele yokutula omidimba molwashi oiyadi unene.
Omukulunhuwiliki wouhaku moshitukulwa shaHangwena Johannes Hango, okwa koleka ta ti oshipangelo osha taalela eshongo linene lonhele yokutula omalutu ovanhu.
“Paife omalutu ovanhu mokila oku li mo eli londa a finana mo,” Hango ta ti.
Okwa ti omalutu amwe okwa kala mo okudja ketameko lomudo ou ndele fiyo opapa inaa ilwa ko.
Hango okwa yelifa ta ti eefamili dimwe ohadi kwata unene efimbo lile opo di dule okufudika ovakwapata vavo.
“Omapata amwe oku na oidila kutya omunhu wavo iha pakwa diva. Onghee okwa ti eshi oshi li eshongo linene la taalelwa koshipangelo nosha eta okila ihade,” Hango ta ti.
Okwa weda po ta ti oshipangelo shaNgela osho shimwe hashi ya kula omwaalu muhapu wovanhu monooli mwa kwatelwa ovakwashiwana Ovaangola.
“Ngeenge okila ihadi iha i longo vali nawa okutalaleka shaashi omivelo dokila oha diidile noudjuu,” ta ti.
Okwa ti ombelewa yaye oha ningi eenghendabala dokushivifila oshiwana moRadio shi ka taleko omalutu ovakwapata wavo.
“Oshipangelo shaNgela oha kuetwa yoo vali omalutu ovanhu a pumbwa okutanda a dilila koipangelo ya yooloka,” ta ti.
Hango okwa indila oshiwana opo shi kale alushe tashi ka ningi omafudiko moule womafiku mashona shaashi otashi kwafele okukelela okila iha hade omalutu ovanhu.
“Ngeenge olutu lomunhu la kufwa mokila pefimbo ota shi yandje omhito kovanhu opo va dule okuetamo omalutu ovakwapata vavo,” Hango ta ti.
Eekila koitukulwa ngaashi Oshikoto, Omusati nOshana ina ku didilikwa kuna oupyakadi weekila dihadi.
fhamalwa@nepc.com.na