Ovakalimo vomOkongo ova etelwa omayakulo popepi molwaashi paife ova mona ongulumambo tai ka longifwa kovanafikola mwa kwatelwa ovanyasha.
Omukulunhuwiliki wehongo moshitukulwa shaHangwena Isak Hamatwi okwa koleka ta ti ongulumambo oya patuluka paife novanailonga ove lilongekida okuyakula nawa oshiwana.
“Eengulumambo otadi twikile okudana onghandangala okuyandja omayakulo kovanafikola,” ta ti.
Okwa didilikwa ovanyasha ovo unene hava holoka momwaalu muhapu oku ka konga omayakulo kongulumambo ngaashi okuninga omaindilo oilonga, okupewa eetundi dokompiuta noshoyo okuninga omapekapeko oilongwa yavo yofikola.
Kongulumambo ei oku na omambo eetundodo da yooloka omo ovanafikola ve hole okulesha omambo.
Mopaife ngaha moshitukulwa shaHangwena omu na eengulumambo mbali.
Hamatwi okwa popya ta ti ongulumambo yaKongo oya taalela omhumbwe yomambo ina wana nosho tuu oikwafifohongo imwepo.
“Eengulumambo oda pumbiwa kovanafikola opo va kale tave li hongelemo unene tuu pefimbo lomakonakono noshoyo okulongifa eekompiuta okuninga omapekapeko oilongwa yavo,” ta ti. Okwa weda po ta ti eengulumambo oda nunimwa oshiwana, noshafimana opo va talelepo eengulumambo okukonga omayakulo.
Okwa kumaida ovanhu opo vaha teye po ile okuvaka po oilongifo ndele nava longife nawa ongulumambo.