WINDHOEK
Okongressa yopashigwana tayi kundathana kombinga yomafamili, noyi li yotango yoludhi nduka ya gongala moshilongo, oya tamekele metiyali mOvenduka. Okongressa ndjoka ya longekidhwa kOshikondo shIilonga yOnkalonawa muuministeli wuundjolowele oyi li oshitopolwa shEsiku lyOmafamili mUuyuni shoka hashi dhimbulukiwa eti 15 Mei muuyuni. Iikundathanwa yesiku oya kwatela mo esimano lyomafamili.
Omalalakano gokongressa okukaleka po ongushu yefamili nokutopolelathana iinakugwanithwa yomegumbo oshowo oompito dhiilonga. Oshigongi shoka sha kuutumba kohi yoshipalanyolo: “Ootate nOmafamili, Iinakugwanithwa nOmashongo,” osha ungaunga niikundathanwa ngaashi onkandangala yaalumentu mefamili/egumbo, Oveta yOsapota (Maintenance Act) oshowo omaikuthomwenyo moNamibia.
Omukalelipo gwEhangano lyUundjolowele mUuyuni (World Health Organization – WHO), Dr. Olufemi Oke, ota ti edhimbuluko lyesiku olyo euliko lyesimano lyopaigwana muuyuni okusimaneka omafamili muuyuni auhe. “Sho omafamili taga shongola nokuninga po omashona okuza komikalo dhuukwazimo miigwana yopamithigululwakalo, notaga ningi omafamili gaantu ashike yomuyalu omushona lela, iinakugwanithwa noonkandangala dhomusamane otadhi monika dha lunduluka noonkondo.” Oke ota ti pamukalo gomafamili gopamuthigululwakalo, iigwana oya kala nesiloshisho lyopamuhanga yootate, ihe pethimbo ndika omikalo dhomafamili oshinakugwanithwa shatate oshe mu gwilila po. Oke ota ti ekuthombinga enene lyoomeme moompito dhiilonga, ano ongaaniilonga olya etitha iinakugwanithwa ya gwedhwa po kootate opo ya kale taya kutha ombinga yi wetike muuteku wesiku nesiku nepututho lyaanona.
Omukalelipo gwoWHO okwiindile pu totwe omilanduveta tashi yambidhidha ombepo ombwanawa yootate miinakugwanithwa yawo mbyoka ya kuthwa po komithigululwakalo nomitotolombo dhoka tadhi ti ootate aluhe oya tseya iinima ayihe ya pumbiwa okuyambidhidha omafamili gawo.
“Otwa pumbwa okutula po omilanduveta nomautho ngoka taga ungaunga niinima ya guma ooproholama dhendungiko lyootate/aalumentu, ekalekopo lyekwatathano lya kola pokati kokanona nahe, okuza puuhanona ano pevalo moshipangelo,” Oke ta ti. Ta gwedha po kutya omilanduveta dhoka tadhi opalele ootate ongaashi okutula po omafudho gootate uuna aaholike yawo ye li mefudho lyepulumutho, oowili dhiilonga dhi li nawa, nomafudho gaalumentu ye na omagumbo/omafamili, oshowo ombepo ombwanawa yeyambidhidhathano pokati kaalumentu naakiintu.
Metumwalaka lya leshwa peha lye, Ominista yUundjolowele nIilonga yOnkalonawa, Dr. Richard Kamwi, okwa dhimbulukitha ootate kutya oshinakugwanithwa shawo inashi hulila ashike meyambidhidho lyoshimaliwa, ndele osha kwatela mo wo eyambidhidho yopamadhiladhilo nomaiyuvito gaanona.
“Osha kwatela mo oongushu nomauthompango ngaashi uushili, eisimaneko, eyakulo nesimaneko lyomauthemba gaantu yalwe,” Kamwi ta ti.
Okongressa oya tala wo kompito okutota po olaata yopashigwana yi nasha nomafamili ndjoka tayi ka kala olutu olutonateli lwomainyengo niilonga yomafamili. Iikundathanwa yilwe oya tala wo komafamili nomaidhipago moNamibia oshowo okutunga po eitumbepo lyomafamili uuna ga gwililwa po komaudhigu. Aakuthimbinga pokongressa ndjika yomasiku gatatu oya yambukile kiitopolwa 13 moshilongo.