RUNDU
Okongressa yOngundu yoSWAPO moshitopolwa shaKavango okwa tegelelwa yi gongale mehuliloshiwike ndika. Omutumba nguka gopashitopolwa okwa li gwa kalekwa iikando iyali opo iikandjo ayihe yopashitopolwa yi hogolole aawiliki yawo. Omuunganeki gOngundu yoSwapo moshitopolwa shaKavango, Vincent Likoro ota ti kutya kakele komahogololo, okongressa ndjoka yomasiku gatatu otayi ka konakona iinima mbyoka ya kundathanwa piigongi yopaikandjo ngaashi omaupyakadhi ge nasha nokumona omikanda noombapila dhopashigwana, iinima ya guma uunamapya, oHIV/AIDS nosho tuu.
Likoro ota ti momutumba nguka gopashitopolwa otamu ka hogololwa iilyo yokomitiye yopashitopolwa mboka taya ka ninga aakalelipo yopashitopolwa kOkongressa onene yOngundu yoSwapo ndjoka ya thanekwa okugongala kuyele nuumvo.
AmushangaNdjayi gOngundu yoSwapo, Dr. Ngarikutuke Tjiriange, okwa tegelelwa a ka patulule pambelewa okongressa ndjika yopashitopolwa nena. Pokongressa ndjika otapu ka hogololwa Omuunganeki gongundu gopashitopolwa, Amushanga gOmauyelele oshowo Omudhiginini gwIiniwe gOpashitopolwa. Pethimbo ndika Vincent Likoro oye Omuunganeki gOpashitopolwa, Vilho Shikukumwa oye Amushanga gOmauyelele, omanga Engelbert Muyenga e li Omudhiginini gwIiniwe. Pokati mpoka aawiliki ayehe yopashigwana mboka ya pewa iinakugwanithwa yopashitopolwa okwa tegelelwa ya ka gongale poshigongi shika, nokukwatela komeho omahogololo ge nasha naawiliki yopashitopolwa. Kakele kaaleli yopashigwana, okongressa okwa tegelelwa yi ka gongalwe kaakalelipo ye li 100 okuza kiikandjo ayihe moshitopolwa shaKavango.