Auleria Wakudumo
Ouministeli womidingonoko, oixwa nomapashiono owa indila oohandimwe, ovanangeshefa, omalelo opaitukulwa osho yo ovaleli vopamufyuululwakalo opo va xulife po okufula omadu inashi pitikwa momidingonoko davo.
Momukanda wa pitifwa kuMinista womidingonoko, oixwa nomapashiono Indileni Daniel okwa holola kutya ouministeli owa didilika natango ovanhu tava twikile okufa omadu inashi pitikwa koitukulwa ya yooloka yoshilongo.
“Okufa omadu ohaku wilikwa tete komapekapeko oo haa tale ngeenge okufa omadu ponhele oyo otaku tula sha moshiponga osho yo omhangela yomidingonko nepitiko okudja kombelelwa hai ifanwa oEnvironmental Commissioner oyo hai ku pe odjapo yokufa edu hai ifanwa oEnvironmental Clearance Certificate (ECC),” Minista ta fatulula ngaho.
Minista okwa ti ouministeli owa didilika yo kutya oilonga yokufa omadu otai ningwa kwaavo vehe na ondjapo yepitikilo loku shi ninga okudja kombelewa yoEnvironmental Commissioner ngaashi shi li sha pitikwa kokatendo kekwatelepo lomidingonoko hano oEnvironmental Management ko2007 (okatendo katiheyali ko2007).
Daniel okwa ti efo lomadu osho yo efo loupate vomamanyanya ohali eta oshiponga momidingonoko, kovanhu, nokoinamwenyo.
“Ohashi eta embuwalo ledu, etukukepo lomatale nomilonga domeva. Ohashi nyonauna yo edu lounamapya momapya ovakwash iwana osho yo okunyonauna omatungo nomaliko oshiwana,” Daniel ta holola.
Minista okwa ti oilambo oyo hai fiwa po konima yokufa edu ohai hada omeva ngaashi naana pefimbo eli lodula osho hashi eta emonifo loshiponga koimuna, ovanhu navo ova didilikwa hava wile nokukanifa eemwenyo davo momalambo a tya ngaha unene ngaho ounona.
Ouministeli owa holola kutya nonande wa didilika kutya ope na omhumbwe yomadu moshilongo okulonga eepate, omaumbo, omatungo nokulonga oilonga imwe, exumokomesho itali dulu okutulwa komesho omanga itaku fiilwa oshisho omidingonoko.
“Ouminsteli otau ka kwatafana nokuninga omahongo moitukulwa kombinga yeemhango dokufa edu moshiwana,” Minista ta ti.
Ouministeli otau indile ovakufimbinga aveshe opo va holoke momwaalu muhapu nokukufa ombinga momahongo oo taa ka ningwa koitukulwa. Ouministeli otau indile yo Ovanamibia opo va xulife po okufa omadu inashi pitikwa.
Oshiwana otashi kumaidwa opo shi landule omilandu neeveta odo da tulwa po ngeenge tashi ya kokufa omadu.
-awakudumo@nepc.com.na
