OUTAPI – Uuministeli wuuhaku nonkalonawa owa ti aantu ye thike po135 ohaya hulitha omumvo kehe komukithi gwokaankela.
Omupeviminista muuministeli wuuhaku nonkalonawa Esther Muinjangue okwa ti aakintu ye li 230 ohaya monika omukithi gwokaankela yokiilyo yiivalithi omumvo kehe.
Ndhoka okwa li e dhi popi esiku kwa li kwa dhimbulukwa esiku lyokaankela muuyuni, ndyoka lya dhimbulukilwa kOutapi moshitopolwa shaMusati. Ta ti, nonando Namibia a li a konakona okaankela aantu ye vule 138 000, okuza mo2018, natango omwaalu ngoka itagu etitha omukumo oshoka oyendji natango inaya konakonwa. “Oshigwana nashi kuthe ombinga momakonakono gomukithi gwokaankela yokiilyo yiivalithi, ngoka taga ningwa oshali miipangelo yepangelo,’’ ta kumagidha ngaaka.
Okwa indile wo Aanamibia ya kale aluhe haya ki ikonaakonitha okaankela, ihe hapaife ashike. Muinjangue okwa lombwele engungo lyaapulakeni kutya okaankela yokomagundji nokaankela yokiilyo yiivalithi oya nika oshiponga, ihe ohashi kwathele uuna ya monikila ko. ‘’Okaankela yokiilyo yiivalithilo ohayi vulu okupangwa, nohayi vulu okukeelelwa,” ta yelitha ngaaka.
Oshihwepo kehe gumwe a ye komakonaakono opo a kale e shi mpoka a thikama kombinga yokaankela. Poshiithanene opo tuu mpoka, omupangi gumwe okwa lombwele aantu kombinga yomaludhi gookankela ngoka gi igalala moNamibia, mwa kwatelwa okaankela yoshipa, yokomagundji, yokiilyo yiivalithi, yomomuligu noyokomandjandja.
Okwa ti, okaankela ohayi etwa kiikulya yimwe, komakaya, komudhingoloko, koonte dhetango, kekako nokelongithonayi lyiikolitha.
Omupangi ngoka okwa holola wo omalimbililo kombinga yaalumentu mboka yaa hole okuya komakonaakono gomukithi nguka. “Osha simana aalumentu ya uvithwe ko kombinga yokaankela, oshoka oyendji oya itaala kutya aakiintu oyo ashike iihakanwa yokaankela,” ta popi ngaaka.
Ta fatulula kutya okaankela unene ohayi kwata kiilyo yaalumentu, noya nika oshiponga, yi dhipaga unene aalumentu, ihe omolwokwaayikoaakonitha kuyele nokwaauva ko kutya omukithi ngoka ohagu vulu okukwata aalumentu. Okwa tseyithwa kutya oopelesenda 75 dhaalumentu ohadhi kwatwa kokaankela ndjoka omvula kehe, nuunene kaanamimvo okuza 65. Okaankela oyi na omandhnidhiliko ngaashi, okusitama uusiku olundji, okululuma moshinena ngele to sitama, okusitama ombinzi, oshowo ombunda tayi pi.
Otaku hokololwa okaankela yokomapunga nayo hayi dhipaga aantu.
-vkaapanda@nepc.com.na
Okaankela yokomagundji ndjoka unene hayi kwata oomeme okwa lopotwa kutya oyo tango ya nika oshiponga, taku landula yokiilyo yiivalithi ontiyali.