Omundokotola e na owino mokuyandja omayakulo oudu wopamadilaadilo okwa ti okulikufa omwenyo kaku shi ekandulepo lomukundu ndele olo oshietifi shomukundu.
Dr. Moges A Admassu wokoshipangelo shaShakati okwa ti kape na oudjuu itau dulu okukandulwa po, po kape na oudjuu hau kalele fiyo alushe.
Onghee okwa ti ovanhu inava kala vali tava kufa omatokolo okulikufa eemwenyo ngeenge ve lihanga tava hepekwa komaupyakadi ashike nava ka konge omakwafo koipangelo kovaxungimwenyo.
Edi Admassu okwe di popya pefimbo ledimbuluko lefiku loudu wopamadilaadilo mounyuni la li kOngwediva Etitano.
Okwa ti osha nyika oshiponga ngeenge omunhu a kwatwa koupyakadi wopamadilaadilo shaashi ohashi eta opo omunhu a kwatwe komhepo yokulikufa omwenyo.
“Osha fimana opo omunhu ngeenge ta hepekwa koupyakadi wopamadilaadilo a ka konge omakwafo kovafitaongalo ile kovaxungimwenyo pefimbo shaashi eshi otashi keelele aha kwatwe komhepo yokulikufa omwenyo,” ta ti.
Onghee okwa ti oudu wopamadilaadilo ohau dulu pangwa ngaashi naanaa omikifi dikwao nado hadi dulu okupangwa.
Okwa weda po ta ti Namibia oku li ponomola onhi-4 muAfrica ngeenge tashi ya povanhu ve likufa eemwenyo omanga mounyuni oku li ponomola 11 novanhu ve likufa eemwenyo.
Okwa yelifa ta ti oupyakadi wopamadilaadilo ohau dulu okuetwa konima ya yooloka ngaashi oluhepo nondjala, edopo, okuhe na oilonga, okuhe na omalukalwa, okuningwa nai, omaupyakadi momakwatafano opaihole, omunhu ngeenge e na omukifi wonhumba noshoyo tuu.
Okwa kunghilila oshiwana opo shi kale tashi yambidida ovanhu ve na oukwatya wokulikufa omwenyo.