Omunashipundi welelo laUkwanyama Eliaser Waandja okwa ti onghalo yovakainhu tava tokelwa meendingosho noumatyona nayo otayi indjipaleke oibofa yekwatonghonga.
Okwa ti osha nyika oshiponga ngeenge omukainhu a kolwa e li mokati kovalumenhu ile ta ende moixwa oye auke.
Waandja ta ti ovakainhu vamwe ove hole okulandelwa omalodu kovalumenhu osho hashi eta va kolwe vo va ka tetwe meendjila ile va iwe navo vehe shi apa ve li.
Onghee okwa kumaida ovakainhu opo ve livangenke okulandelwa omalodu kovalumenhu shaashi eshi otashi ulike omukalo wokulilandifa po komalodu.
Meenghundafana a ninga naKundana Etine Waandja okwa ti ovakainhu nave li imaneke ngeenge ve li peenhele domanwino.
“Ngeenge omukainhu okwa landelwa omalodu komulumenhu ohashi dulu okueta opo omulumenhu oo e mu landulile moixwa ndele ta i naye moixulo keenghono,” ta ti.
Okwa yelifa ta ti ovalumenhu vamwe ohava kwata onghone ngeenge va landela omukainhu omalodu ndele omukainhu oye tuu oo ta anye a ye naye moixulo.
Ta kumaida ovakainhu ta ti nava lungame shaashi oshinima eshi otashi xwaxwameke yoo omahepeko oomeme nomadipao.
Waandja ou e li elenga lakula shikandjo shaNandova okwa hokolola ta ti elelo laUkwanyama oli li omhinge novalumenhu tava kwata ounona voukadona noshoyo ovakainhu onghonga.
“Nafye ihatu kala twa hafa ngeenge melelo laUkwanyama tamu longwa oimbuluma unene omakwatonghonga novaholafani tave lidipayafana,” ta ti.
fhamalwa@nepc.com.na