OSHAKATI – Omunangeshefa gokonooli a tseyika nawa “Josua Emirates Haimbodi” okwa kuutumba noshifokundaneki shika, ta hokolola nkene ondjila ye yongeshefa ya ende, nankene a pondola okusinda omashongo opo a thike ponkatu mpoka e li nena.

Okwa totha mo iitya ya simana ta ti, eyidhidhimiko, eyitulemo osho wo elongelokumwe oyo iipatululo okupondola omashongo nokuhuma komeho. 

Epulo: Ngele taku popiwa Josua “Emirates” Haimbodi otaku popiwa lye, nokwa tameke ongeshefa ye ngiini?

Eyamukulo: Ongame Josua Haimbodi, nda valelwa komukunda Onambome-Okalongo moshitopolwa shaMusati, esiku ndyoka lya ndhindhilikwa pandjokonona sho omukwaniilwa gOndonga Elifas Shuumbwa a dhipagwa.

Onda tameka ehongo lyandje lyopevi kosikola Sheetekela Combined, tandi ka tsikila kosekundosikola Iipumbu mOshakati. Onda tsikile eyilongo lyandje sigo okiiputudhilo yopombanda, nonda mono onzapo yoBachelor of Science moPolitical Science okuza koshipudhilo Bircham International University koSpain. Ngame omunangeshefa a tameka okuza ketameko manga inaandi tseyika moshigwana. 

Sho nda mana eyilongo lyandje onda li nda kala pevi ndaa na iilonga, ihe onkalo sho ya dhenge ndje, onda li nda lundulula onkalo yandje wo, ndi longekidhe onakuyiwa yandje, ngaashi naana nde yi longekidha ngeyika. 

Onda li nda tameke ongeshefa yandje okuza mokunyangadhala kwandje, sigo nda thiki mpaka ndi li nena, nokwa li nda luku ongeshefa yandje Emirates Construction.

Epulo: Oshike sha pendutha omadhiladhilo goye opo wu tameke ongeshefa?

Eyamukulo: Oshoka onkalo okwa li tayi yaga kesipa, onda mono kutya opo ndi vule okuhupitha aakwanezimo yandje ondi na okuya po nongeshefa oshoka iiloga ihayi iyeta, ihe ohayi kongwa.

Epulo: Uupyakadhi wuni wa tsakaneke sho wa tameke ongeshefa?

Eyamukulo: Oshimaliwa shokutameka ongeshefa osha kala uupyakadhi, ompito yokwiindila oshimaliwa shokutameka ongeshefa inashi kala oshipu nando.

Epulo: Ongeshefa opo yi ende nawa konooli owu na okukala wu na omilandu dhini opo yi ende nawa? Oto ti ko ngiini?

Eyamukulo: Okulonga nongeshefa konooli ohaku pula omadhiladhilo gomuule. Ngashiingeyi omayambidhidho goongeshefa konooli itaga longo nawa shoka tashi shunitha wo oongeshefa monima. 

Epulo: Kehe omunangeshefa ope na ethimbo kwali a taalela omashongo nomayipumomumwe, goye otaga ti ngiini? 

Eyamukulo: Otandi dhimbulukwa sho kwa li tandi tungu ehala lyomayinyanyudho nokuthuwa po lyedhina Five-Star, ndyoka nda longo omimvo heyali, ondjila okwa li onde noya li yi na omashongo. 

Ashike omashongo ngoka oga longo ndje oshindji mongeshefa, eyidhidhimiko, elongelokumwe osho wo eyitulemo. Nena oongeshefa dhandje otadhi ende nawa.

Epulo: Oongeshefa dhoye odha tseyika dha koko notadhi shi enditha nawa konooli, owe shi ende ngiini?

Eyamukulo: Sho nda kala ndi li koluuli, onda kala tandi simaneke nokugwanitha po omadhidhiliko gomoondjila. Eyitulemo lyandje olya thikitha ndje mpaka ndi li nena, oshoka inandi itaala mokusholola.

Epulo: Olye e ku pe omukumo opo wu thike mpoka wu li nena?

Eyamukulo: Onda pewa omukumo kaaleli aakuluntu mpoka ya yambidhidha okuhumitha komeho lyoshilongo shika okupitila miilonga yawo, tandi tumbula omunangeshefa a tseyika nawa, Frans Aupa Indongo osho wo Veikko Haimbodi mwene gomatungilo goDolly Mall.

Otandi pandula wo omukulukadhi gwandje ngoka a kala nokuyambidhidha ndje uuna nda pumbwa ekwatho. Natango onda kala wo tandi kutha oshiholelwa kaanangeshefa mboka nda adha mo nale. 

Epulo: Etumkwalaka lyini to gandja kaanyasha mboka ya tala kungoye?

Eyamukulo: Onda hala aanangeshefa mboka opo taya koko ya longe neyitulemo okugwanitha po iilonga uuna ya pewa oshinakugwanithwa shasha, ihe haku landa ashike oohauto dhondilo.

Otandi kumagidha kutya, naya tameke naashoka ye na po osho wo naampoka ye li. Naya kale wo ye na omikalo nelongitho lyiimaliwa, unene mboka opo taya tameke.

Uuwanawa ihau zi pokapala ka yela, owu na okulonga opo wu ka likole iiyimati iiwanawa.

Epulo: Sho wa tala oongeshefa dhoye monakuyiwa otadhi ka kala ngiini?

Eyamukulo: Onda hala oongeshefa dhandje dhi koke, opo wo ndi vule okukuta aaniilonga oyendji, nomomukalo ngoka otandi humitha komeho oshilongo shetu komeho.

Onda hala wo monakuyiwa ndi ete po elunduluko momangeshefelo gandje, mpoka ndi li nena , hapo ndi kale momimvo tadhi ya.

Otandi kumagidha wo aanangeshefa aashona, mboka opo taya tameke opo ya kale ye na omukumo, yo yalonge yi tula mo.

Ngele ondi li mpaka nena, okuza ashike kokandingosho komanwino, oshike mbela gumwe ita vulu okushininga, ano okulonga nuudhiginini oko ashike.

-vkaapanda@nepc.com.na