Ngoloneya gwoshitopolwa shaHangwena Walde Natangwe Ndevashiya okwa ti aantu moshitopolwa she otaya ende kashona okutuntilwa, komukithi gwoCovid-19.
“Sigo oompaka, aantu 6 564, yatuntilwa oshikando shotango omanga yeli 1,238 oyo owala ya tuntilwa ikando iyali moshitopolwa ashihe shaHangwena,” ta fatulula ngaaka.
Ta ti, ehwata lyomiti dhoAstra-zeneca oshowo Covi-shield, odhali dha andjanekwa mo mahala gwuuhaku moshitopolwa ashihe shaHangwena momasiku 19 gaApilili nuumvo, no kwali oye go tango okutuntilwa. “Aantu ya pita 55 oya si moshitopolwa shaHangwena, naantu yeli 15,064 oya kwatwa yomukithi ngoka, okuza esiku gwaponokele moshitopolwa, omumvo gwayi muJuni,” ta ti ngaaka.
Ndevashiya okwati, okuuvite kutya okutuntulwa ota kuzi kehalo lyomuntu ye mwene, ihe ota indile kehe ngoka inaa wendwa sigo onena, athikame opo aka wendwe, okukeelela omawuwehame oshowo omaso omolwa omukithi gwoCovid-19.
“Oshigwana nashi hulithepo okupalakena koohapu dhiifundja, tadhi popile omiti dhoka muuwinayi, ihe nadhi pulakene kuuyelele taya pewa okuza kaanilonga momandiki guundjolowele mboka yena ontseyo mu sho,” ta kumagidha.
Takumagidha oshigwana shi kale shina eiyitalo momawuyelele tashi pewa okuza kiikando yuundjolowele ayihe. Ta ti shoka otashi gandja omukumo kaantu ayehe, omilandu adhihe dhilandulwe noku simalekwa opo omukithi ngoka gu sindike nogu hulepo esiku limwe.
Ngoloneya okwayelatha kutya omukithi ngoka otagu vulu okuhula po ashike una, oshigwana tashi pulakene noku landula omawuyelele geli mondjila.
“Otandi pandula ookansela, ooyene yomikunda omalenga omanene aanangeshefa ayehe sho yeli mombepo yimwe okulwiitha oshowo okukumagidha oshigwana momidhingoloko dhawo, nkene yena okusinda noku keelela oCovi-19,” ta popi ngaaka.
Ta ti, oshitopolwa ShaHangwena oshili metifa okulwiitha omukithi ngoka tagu taandele kehe esiku, nogweetitha omaso ga igalala moshigwana.