Kakukutu komatanga opolifi Inspector General Joseph Shikongo okwa ti okuyelayelwa moilonga ka kushi ashike okufewekwa neembadi ashike okupandula nokuyandja etumbaleko kovapolifi molwoilonga iwa tava longo moshiwana.
Edi Shikongo okwe di popya Omaandaxa koshindingili shovanambelewa vopolifi vayelwa moilonga paenghatu da yooloka.
Ta ti oku yandja eembadi itashi kutya omupolifi na kale omutumba mombelewa a mwena ndele okuva xwaxwameka va twikile nokulonga nondjungu.
Ovanambelewa vapolifi veli 4682 va dja moitukulwa ya yooloka, ova ova djalekwa eembadi deenghatu okudja poconstable sergeant class2, no class1oshoyo warrant officer class1 no class 2.
Ovapolifi vayelwa ovakwatelamo ovakainhu veli 2044.
Kakukutu okwa ti ovapolifi otava tameka neenghatu davo dipe moilonga, tashi valulwa okudja petameko lomwedi ou. “Omunhu ngeenge ota longo oshilonga shiwa moshiwana natumbalekwe. Ovapolifi ohava longo nondjungu okukaleka po eameno lovanhu moshilongo nokukelela oimbuluma,” ta ti.
Onghee okwa ti elalakano lokuva yela, okuvatwa omukumo nokuvaxwaxwameka va twikile okulonga nondjungu fiyo tava ka pewa vali eenghatu da landula ko.
“Omunhu ohayelwayelwa she li kwatelela koilonga yaye iwa ta longo moshiwana,” Shikongo ta ti.
Shikongo okwa kumaida yoo ovapolifi ovo va pewa eenghatu dipe opo va ulike oshihopaenenwa shiwa moshiwana molwashi ohava longo nokutula po elandulafano nokukaleka po eameno loshiwana.
“Omupolifi ina pumbwa okukala ta kolwa e li meendingosho a djala omudjalowoilonga. Omupolifi ina pumbwa okukala ta kufa ombinga moilonga ya nyika oumbudi ile ta ningile ovanhu omahepeko oukashike kookanhu,” ta ti.
Shikongo okwa kumaida yoo vali ovanambelewa vopolifi opo va fimaneke oshiwana, oku li humbata nawa, nokukaleka po eameno loshiwana.
Okwa lombwela ovapolifi opo va fimaneke ovanhu aveshe nokupopya nawa noshiwana ngeenge tashi ka konga omayakulo opolifi koitaashi.
Ovapolifi va pewa eembadi ova pandula Shikongo molwashi eva dimbuluka nokuva pa eenghatu dipe moilonga.
Onghee ovati otava twikile okulonga nondjungu nokuyakula nawa oshiwana ngeenge tashi kongo omayakulo opolifi.