ONESI – Juuso Namusha weedula 59 okwa ti okaana kaye keedula mbali oka dipawa komukainhu waye konima eshi e mu lombwela kutya ine mu hala vali. 

“Onde mu taataa meumbo lange. Onda shivifila nakapatashu wetu kutya omukainhu ou a dje mo meumbo lange,” ta ti. 

Nakudipaa okaana haye ina yokaana. Okaana oko Lidia Namusha, keedula mbali. 

Oshiningwanima osha ningwa oshivike sha dja ko komukunda Ohalumbele moshitukulwa shaMusati. 

Omufekelwa medipao lokaana oye Hilya Heskia weedula 31, okwa holoka momhangu yamangestalata wOtapi nokwa anyenwa omhito yokulifutila mo. 

Oshibofa shaye osha undulilwa komafiku 14 Juni 2026. 

Pefimbo Kundana a talela po eumbo onghela, Namusha okwa hokolola ta ti okwa li hava di meumbo limwe naHilya ou e li vati a dipaa okaana kaye. 

“Otwa tameka ekwatafano letu lopaihole naye omudo wa dja ko muAguste. Onda ka didilika kutya mboli ke na omikalo,” ta ti. 

Namusha okwa hokolola ta ti konima yoivike itatu ova topoka. 

“Oshivike sha dja ko Omaadaxa, onda ka tala okaana kange kuina opo ndi dule okudja nako,” ta ti. 

Okwa yelifa ta ti Hilya oha di pomukunda umwe naye. 

“Naina yokaana naye oha di pomukunda umwe navo,” ta ti. 

Okwa hokolola ta ti omufekelwa okwa lombwelwa keendingosho kutya okaana paife ohaka di naxe. 

“Okwa li eshi ngeenge pamwe eshi nda eta okaana kange meumbo lange onde lishunina naina yako,” ta ti . 

Okwa yelifa ta ti omufekelwa okwa uda omahokolo oipupulu kutya ohandi hombola po ina yokaana. 

“Onda hangika nale nda xulifa po ekwatafano lopaihole naina yokaana kange,” ta ti. 

Namusha okwa ti kave na okaana nomufekelwa ou. Okwa hokolola ta ti Etine okwa ya keendingosho fiyo oufiku. 

“Eshi nda fika meumbo onda ya konduda oku haku nangala ounona nelalakano lokutala ngeenge omo ngaho ve li meumbo, onda pula ovaneumbo kutya okaana oke li peni. Ova nyamukula kutya kave shiwo,” ta ti. 

Namusha ta ti efiku olo meumbo okwa li ashike mu na ounona aveshe. 

“Otwa landula omhadi ye ya meumbo. Otwa mona kutya okaana mboli oka vakwa mo,” ta ti. 

Okwa ti mboli omufekelwa okwe ya meumbo oufiku ndele ta kufa okaana ndele tai moixwa, onmo e ke ka pondela. 

“Okwe ka tula moixwa koshi yomuti ndele ta i keumbo lavo,” ta ti 

Ina yokaana Eveline Abner weedula 30, okwa ti okwa dengwa pomutima kefyo lokaana kaye. 

“Okwa dipaa okaana kange kehe na ondjo. Mboli ngeno okwa li inandi yandja okaana kange kaye naxe,” ta ti. 

-fhamalwa@nepc.com.na