Charles Ndeumane
Sha landula sho omulumentu i ikutha omwenyo moshitopolwa shaMusati konima anuwa sho ya nyenyeta nomukulukadhi gwe, opolisi moshitopolwa moka oya kumagidha aantu ya mangulukile okukonga omakwatho.
Omukuluntu gwopolisi moshitopolwa shaMusati Commissioner Ismael Basson okwa kumagidha oshigwana unene tuu aalumentu ya konge omakwatho uuna ya taalela omaudhigu oshoka okwiikutha omwenyo kaku shi ekandulepo lyomukundu. Basson okwa popi ngaaka sha landula sho omukalimo gwomomukunda Ongolo moshitopolwa shaMusati omunamimvo 55 Josua Kleopas i imangeleke mOlyomakaya ga zi ko konima anuwa sho ya nyenyeta nomukulukadhi gwe megumbo lyawo.
Anuwa konima sho Kleopas a nyenyeta nomukulukadhi gwe okwa zi mo megumbo a uka miihwa yi li popepi, nokonima yokathimbo omukulukadhi sho e mu landula okwa adha olutu lwe lwa endjelela momusati, i imangeleka nongodhi yoplastika.“Ngele omuntu owu na uudhigu konga ekwatho mpoka tali monika, oto vulu okupopya naahungimwenyo, aasita yoongeleka, nenge nopolisi. Ngele owa popi uudhigu woye oto vulu okupewa omayele tage ku kwathele,” Basson ta ti.Basson okwa ti uuna omuntu wa lombwelwa uudhigu wamukweni itashi ti wu ke wu lombwele aantu yalwe ashike nashi kale oshiholekwa oshoka omuntu gumwe ota vulu okwiimangeleka ngele okwa uvu iiholekwa ye tayi popiwa kaantu mboka inaa lombwela.
I iyaha nondjembo
Moshipotha sha yooloka sheikuthomwenyo, omunamimvo 32 William Nandekumba Haufiku omukalimo gwomomukunda Ongholyo mOndobe moshitopolwa shaMusati ngoka a li ha longo ongomugameni gwomaliko okwiiyaha nondjembo yomushasho.
Anuwa Haufiku okwa monika lwahugunina komulandithi gwopehala lyomanwino mpoka a li ha longele momukunda Oshikushashipya moshitopolwa shaMusati mOsoondaha ya zi ko lwopotundi ontihetatu yongula.
Konima yominute 45 kuume kaHaufiku ngoka a yi kondunda ye e ke mu popithe okwa mono ombinzi tayi kunguluka tayi zi mondunda yaHaufiku. Kuume ke okwa ka lombwela omukadhona ngoka ha longo mehala lyomanwino ndele ee taya dhengele opolisi. Opolisi sho ya thiki oya teya po omweelo gwondunda yaHaufiku moka olutu lwe lwa adhika lwa lala kombanda yondjembo yomushasho noshilalo shoholo momutse.
Anuwa aakwanezimo yanakusa oya tseyithilwa nale nolutu otali ka ya komakonakono.