ONIIPA – Mayola gwElelo lyondoolopa yaNiipa okwa ti oya taalela uupyakadhi waantu taya ikuthile omahala kaashi li pamulandu gwelelo lyondoolopa.

Pethimbo a li ta gandja omushangwahokololo gwomayalulo gokomumvo gondoolopa yaNiipa gomumvo 2024/2025 mayola gwondoolopa yaNiipa Jafet Augustus okwa ti gumwe gwomomikundu ndhoka tadhi yi ehumokomeho lyondoolopa moshipala aakalimo taya ikuthile omahala mondoolopa, taya piti elelo pooha.

Augustus okwa ti aantu ohaya ningi ashike omakwatathano nooyene yomikunda e taya pewa omahala kaashi li palandulathano lyelelo lyondoolopa. “Oniipa oya kala ondoolopa yi li pokati komikunda, onkene aantu pomikunda ndhoka oya kala haya pewa omahala kooyene yomikunda. Elandulathano ndyoka olya kuthwa po nale nale nooyene yomikunda oya lombwelwa ya hulithe po okugandja omahala kaantu mondoolopa, ashike natango oya tsikila,” Augustus ta ti.

Shi ikolelela kuAugustus, oshidhigu okwaadha iilalakanenwa yelelo pethimbo ndyoka ya thanekwa oshoka aakalimo oyendji yomOniipa unene tuu momikunda oya kala ye li ompinge nomathaneko gelelo lyondoolopa  nande oge na sha nuuwanawa oshowo ehumokomeho lyawo. Okwiikuthila omahala mondoolopa otaku enditha kashona ehumokomeho lyondoolopa oshoka aantu ohaya ikuthile omahala ngoka ga adhika nale ge li momathaneko giinyangadhalwa yelelo lyondoolopa.

-mrndeumaneraycharles@gmail.com