Elelo lyondoolopa lyaShakati olya kala noku tembundha omalukanda, no tali tsikile okutembundha gamwe ngoka ga hupa ko, ihe olya ti, olukanda lwaPohambo italuka tembundhwa.
Mayola gwelelo lyondoolopa yaShakati Leonard Hango okwati elalakano lyokutembundhila omalukanda kombinga yimwe, kOnawa, okuhumitha ondoolopa komeho oshowo okuyitula pomuthika goondoolopa oonkwawo.
“Otwa tembundhila nale omalukanda gathika pu gane kOnawa, ihe natango otuli metifa okutembundhila olukanda Oshoopala kOnawa, ndoka lwa shiwika nawa “Akambya”.
Ta ti, nonando mboka yeliko otaya nyenyeta kutya inaya hala olukanda ndoka lutembundhilwe popi nayo, oshoka oluna oombundhi, oya ningi onkambandhala okushininga, no mayakulo galwe ga gwendhwa po.
‘’Otuli metifa okufalako osasiona yopolisi oshowo okapangelo komakwatho gotango. Opate ndyoka ya huulila ondjila kati, otayi ka tsakanena, opo tu ete omayakulo popepi naakalimo,” Mayola ta ti ngaaka.
Ta gwedhapo kutya Olukanda Pohamba olwa tulwa nale olusheno kombinga yimwe oshowo omeya.
Mayola ta ti, okwa hupu ashike omagumbo, ngoka tagaka ukililithwa opo ga kale geli melandulathano ngaashi omalukanda omakwawo ga tembundhilwa kOnawa.
“Kapena ngoka taka tembundhwa, ihe otatu ka tula omagumbo momalandulathano noku etelwa omayakulo popepi,” ta ti ngaaka.
Hango okwa popi ta ti, ondoolopa yaShakati momvula ndho komeho, otayi kaninga oshilando, oshoka shoka ya thanekela Oshakati, uuwanawa owindji.
Omukalimo gokOnawa Maria Shikulo okwati, oyeli komahala gawo yuuvite ombili, kaayena uupyakandhi no taya ningi oongeshefa dhawo pomahala gawo yene, kaapena omapiyagano gasha.
“Ota tu pandula elelo lyondoolopa sho lyetu ningile omauwanawa gatya ngiika, nonando twa ningi ethimbo twa taalela omaupyakandhi goothina komalukanda hoka twa twembundhilwa,” ta pandula ngaaka.
Shikulo okwati, ngele owa pewa ompito yoku tembundhilwa kOnawa inoyi tinda, oshoka oto iyimbi uuwanawa.
Cornelia Thobias gokolukanda Pohamba okwati, kayena nando uupyakandhi wo kwaatembudhwa, sha ike elelo yondoolopa tali ya etele omayakulo popepi.
vkaapanda@nepc.com.na