Olutu lomumenhu weedula 24 ina djala oikutu ole lituwa moixwa a xulifa efimbo lokomatango.
Oshiningwanima osha ningwa kofaalama yedina Tsumore i li momudingonoko waTsumeb mexuliloshivike.
Nakufya okwa tongololwa oye Ronaldo Gumuchab omukalimo womolukanda Kuvukiland modoolopa yaTsumeb.
Omupopiliko wopolifi moshitukulwa shaShikoto Chief Inspector Ellen Nehale-Kangulu okwa hokolola ta ti olutu lomulumenhu ou ole lituwa li na eembululu dihapu.
Omulumenhu okwe lituwa e li mekungu lohonde komunailonga womofaalama.
Opolifi oya hokolola tai ti fiyo opapa kape na omufekelwa mediapo eli.
Ota ku hokololwa kutya omulumenhu ou okwa fiya po eumbo efimbo nelalakano lokukatalela po ovakwapata vaye.
Opolifi otai indile moshiwana kwaau e na ouyelele kombinga yedipawo laGumuchab opo a shi lopotele opolifi keshe i li popepi.
Oshingwanima shikwao, omulumenhu weedula 43 okwe li tuwa meumbo monduda yaye yokunangala e li mekungu lohonde.
Oshiningwanima osha ningwa komukunda OmatandomOngwediva moshitukulwa shaShana mexuliloshivike.
Opolifi oya hokolola tai ti omulumenhu ou okwe li tuwa kumushiinda shaye efimbo lomutenya eshi kwa li e ke mu talela po.
Nakuninga oshihakanwa okwa hangika a dinda komutwe, ita dulu okupopya.
Okwa twalwa koshipangelo opo aka ka mone epango lopaunamiti.
Kape na ouyelele kutya omulumenhu ou okwa dengwa kulyelye.
Oshiningwanima shikwao, omulumenhu weedula 23 okwa tambulilwa moshipangelo shaNandjokwe konima eshi a tuwa nombele kukaume kaye.
Oshiningwanima osha ningilwa keendingosho dokOnethidi mexuliloshivike efimbo lokeengulasha.
Ota ku hokololwa kutya ovalumenhu ava okwa li tava tanguna.
Omufekelwa ok-wa kwatwa po nota pangulilwa oshibofa shonghendabala yedipawo.
-fhamalwa@nepc.com.m