Olutu lwomulumentu ina tseyika natango kutya oye lye, olwa itsuwa lwa tetwa iilyo yopaumwene woWindhoek.
Omudhimba gwomulumentu ngoka taku fekelwa kutya okwa li eshenge ogwa adhika momulamba gu li popepi nosikola Chairman Mao Zedong, yi li momudhingoloko gwaTjomuise.
Inspekta omukuluntu gopolisi moshitopolwa shaKhomas Katrina Saara Naukushu okwa ti oshiningwanima osha holoka koWindhoek, pethimbo kaali shiwike, ihe olutu olwa monika ongula yEtine.
Okwa popi kutya natango kaye na uuyelele kutya oshiningwanima shoka osha ningwa kulye, onkene omakonakono gopolisi oge li metifa. Olutu ndoka anuwa olwa adhika lwaana iilyo yimwe.
Opolisi otayi indile moshigwana kehe ngoka e na uuyelele waamboka ya longo iilonga yi li ngaaka, a lopotele opolisi yi li popepi naye.
Eemwedhi mbali dha piti olutu lwaLucky Uwuseb olwa adhika natango momulamba lwa ninga nayi, sho anuwa a dhipagwa kuwalye.
Uwuseb ngoka a tseyika nawa nedhina ‘Queen’ naye okwa li anuwa eshenge. Oshiningwanima shoka osha holoka momudhingoloko Golgota koWindhoek.
Sha ikolelela kopolisi omulumentu ngoka okwa monikile lwahugunina e li nomulumentu ke shiwike momudhingoloko.
Oshiningwanima shoka osha holoka ashike omasiku omashona sho omunaminvo 36, natango oshilyo shehangano lyomashenge a dhipagelwa megumbo lye, e ta yugwa ohauto koDorado Park, Windhoek.