Komufala woshikondo womavyulonghalo moNamibia Commissioner General Raphael Hamunyela okwa ti ombelewa yaye itai ka fiya emanya lo londa ku li kwao ngeenge tashi ya yovanambelewa komavyulonghalo ovo tava longo nolwaambo, onyalo, oku ya koilonga omunhu a lata noshoyo oipupulu yo tai teya po ombili mokati kovanambelewa.
Hamunyela okwa kunghilila ovanambelewa ta ti nava kale tava ulike oshihopaenenwa shiwa moshiwana nokovanadolongo nokukala tava longo payuuki no mo shili.
“Li ka lekeni kokule nokulongifa ombumbo. Yandjeni omayakulo e li payuuki kovanadolongo aveshe pehe na ou ta ningwa okatongo,” Hamunyela ta ti.
Edi Hamunyela okwe di popya koMaruru Etitatu pefimbo kwa li ta popi novanambelewa ovo va mana omadeulo avo.
Ovanambelewa hava longo komavyulonghalo 107, ovalumenhu 28 novakainhu 79 ova pita omadeulo avo oo kwa li tava ningi oule weemwedi nhatu momaifano a yooloka.
Ovanambelewa ova pewa eetundi momadeulo ngaashi ounamapya, exungomwenyo, okulonga nomadilaadilo ovanadolongo, oupangi, okulonga ofikola komavyulonghalo noshoyo okuyandja omayakulo opangeleka.
Hamunyela okwa ti e lalakano lomadeulo okuyandja ounongo kovanambelewa ve li komavyulonghalo opo va kale ve na owino momaifano a yooloka nonghee ve na okukala tava longo novanadolonga va yooloka.
Okwa kumaida ovanambelewa opo va kale tava longo nondjungu moilonga yavo nokukwashipaleka kutya otava yandje omayakulo kovanadolongo ngaashi nanaa va pewa oshinakuwanifa shokulonga komavyulonghalo.
“Ka leni ta mu longele kumwe nokufimanekafana koilonga. Ovanadolong nava kale tava fiilwa oshisho onga ovanhu no nande modolongo ve uya mo eshi va nyona,” ta ti.
Okwa weda po ta ti ovanadolongo navo ovanhu ngaashi ovanhu aveshe onghee osha fimana opo ovanambelewa va kale tava fimaneka oufemba wovanadolongo.