Auleria Wakudumo 

Omahoololo ovakwaita novapolifi mOshana okwa enda nawa onghela mOshakati. Kundana eshi a talela po oshitaasi shopolifi shaShakati opo pa li omahoololo, ovapolifi novakwaita okwa hanga ve li momukweyo natango va teelela omhito opo va dule okuhoolola. 

Nonande vamwe ova li va fikama momikweyo momutenya, ova holola kutya okufikama oshitukulwa shoilonga yavo nova hala va mone omhito yokuhoolola nena opo va dule okukaleka po ombili nelandulafano mefiku lomahoololo aaveshe, momafiku 27 Novemba. 

Omukwatelikomesho womahoololo mOshakati Jessy Auala okwa ti omahoololo ovanambelewa veameno loshilongo okwa enda nawa novapolifi pamwe novakwaita ova holoka momwaalu muhapu okudja ongula eshi va patulula po07h00 fiyo opaife. 

Nonatango eshi etanga leameno li li momukweyo ule, Kundana okwa didilika vahapu tava ende okaendanamhadi tave ya okuhoolola. 

Commissioner wopolifi moshitukulwa shaShana Naftal Lungameni Sakaria oo a kunghilila oshiwana shi likaleke kokule nomalodu mefiku lomahoololo unene tuu pefimbo va uka koitaasi yokuhoolola. 

Sakaria okwa holola ta ti yee okwa hoololela ponhele opo tuu opo, oye a hoolola tete nokuli po07h00.

“Etanga leameno mOshana ole lilongekida okukwatela omahoololo komesho nokukwashilipaleka kutya aishe oya enda nawa momafiku 27 Novemba,” Sakaria ta ti.

Omahoololo ovakwaita novapolifi mOshana okwa ningilwa koshitaasi shopolifi kOshakati osho yo kOluno Community Hall mOndangwa.

-wakudumoauleria@gmailo.com