Ombelewa yomuprimaminista oya indile oshigwana shi hulithe po okutaambathana omauyelele gaashi goshili kombinga yolwishi ndoka lwa topolelwa aakalimo yokOshikoto.
Epangelo lyaChina olya li lya yambindhindhidha oshigwana niikulya netompelo lyoku yambindhindha Namibia sho a li a pula omakwatho okuza kiilongo yilwe omolwa oshikukuta shoka sha kala sha taalela oshilongo.
Oshikoto oshali sha topolelwa olwishi ndoka lwa zi koChiina oshoka anuwa okwali sha hupu ko okumona oshikukuta shoka shali sha gandjwa kiitopolwa mbyoka ya taalela oshikukuta moshilongo.
Komalungula okwa kala taku taambathanwa kutya olwishi ndoka ina lu wopala okuliwa komuntu, anuwa olwafa oonayilona lwo oha lwiikwata.
Omugandji gwomauyelele kombelewa yomuprimaminista Maxmus Halwoodi okwa ti, olwishi ndoka kalu na uupyakandhi nando owa sha, olwa opala okuliwa kukehe gumwe.
“Onga aanambelewa yokombelewa yomuprimaminista ota tu kwashilipaleke kutya otwa konaakona nokulya olwishi ndoka omanga ina lu andjanekwa, ihe kalu na uupyakandhi wa sha,” ta kwashiipaleke ngaaka.
Halwoodi okwa gwedha ko kutya natango okwali ya ningi omapekapeko okuza kaakalimo mboka ya topolelwa olwishi ihe kape na ngoka e na omanyenyeto kombinga yolwishi ndoka.
Ta ti, ombelewa yomuprima itayi ka pitika oshigwana shi tsikile okuandjaneka uuyelele waashi wa shili, itayeke shi tala ko o wala.
“Otandi kumagindha oshigwana sha iitale shoka tashi popiwa komalungula oshoka kashi sho shili, olwishi ndoka kaluna uupyakandhi.
Epangelo itali vulu okuawaleka iikulya yaali nawa koshigwana sha lyo,’’ ta popi ngaaka.
Ta ti, kehe ngoka e na a hala uuyelele wa wagwedhwa po na dhenge konomola 081 352 6479.
Mokaodio taka taambathanwa komalungula hoka ka pulakenwa komutoolinkundana nguka omwa popiwa olwishi ndoka lwa za koChiina ka luli nawa.
“Olushi ndoka nda mona olwafa lu na oonayilona dha tetwa.
Ondeli nengeka momeya uusiku awuhe, ihe sho ndeli kutha mo otali teka, ko kutya ka lili nawa.
Otwa hala olushi ndoka lukondololwe nawa,” gumwe osha a ti ngaaka mokaodio.
-vkaapanda@nepc.com.na