RUACANA – Aantu ye li 362 yomomagumbo ge li 109 moshitopolwa shaMusati, oya tembudhwa omolwomeya gefundja ga yi momagumbo gawo mehuliloshiwike.
Aantu mbaka yomomukunda Otjihitwa ngoka gwa pambula kiikandjohogololo shaNesi noshaRuacana oya falwa kealandjandja lyi li kEtunda.
Omukunda ngoka Otjihitwa, ogwa kondekwa komeya gefundja ngoka ga yi sigo omomagumbo noku yelula omapya gaakalimo.
Kansela goshikandjohogololo shaRuacana Andreas Shintama, okwa ti onkalo ka kwali tayi vulu okwiindhindhimikilwa kaakalimo, sho osho ye ya tembundha ya ye kehala hoka ka kuna omeya.
“Iilya oyi li kohi yomeya noya hanagulwa po omanga omagumbo ge li kohi yomeya,” ta popi ngaaka.
Shintama okwa fatulula kutya, ombelewa yawo yopashikandjohogololo oya gandja omayakulo gotango, sho ye ya dhikile ootenda.
“Otwa kwatathana nuuministeli wuuhaku wu ka gandje omalongo kootenda kombinga ya nkene ye na okwiihumbata.
Otwa popi wo naNamWater opo ya tulilwe po omeya osho wo elelo lyondoolopa lyoRuacana okugandja omayambidhidho ga gwedhwa po, mwa kwatelwa okoopaleka osho wo uundjugo,’’ ta ti ngaaka.
Shintama okwa popi kutya mongashiingeyi iikulya kuyo kashi shi uupyakadhi manga oshoka opo ya adhika ya topolelwa iikulya yoshikukuta, mbyoka ya faalela kootenda.
Ta ti, sho a li ko okwa adha taya teleke, kaye na nando uupyakadhi washa, nonando ye li natango metifa nkene ye na okulongekidha iikulya komasiku gokomeho.
“Aanona natango ohaya yi kosikola, inaya tetwa ko komeya. Paife oye li nokuli popepi oshoka osikola oyi li ashike pooha dhopate,” ta gwedha po ngaaka.
Ngoloneya gwoshitopolwa shaMusati Erginus Endjala sho a li a talelepo aantu mboka ya tembudhilwa kEtunda okwa ti, onkalo oyi li nawa.
“Oya tulilwa po ootenda, omalongekidho oge li metifa okutula ayihe tayi pumbiwa pehala mpoka.
Okakomitiye ke na sha nokuyambindhindha omayonagulo haga etwa kuushitwe moshitopolwa shaMusati otaka kundathana nkene ke na okugandja omayambidhidho kaantu mboka,” ta fatulula ngaaka.
Ombelewa yomupilimaminista nayo oya kwashilipaleke kutya oya tseyithilwa kombinga yetembu omolwefundja koRuacana.
Omugandji gomauyelele kombelewa yomuprimaminista Maxmus Halwoodi okwa ti oye li mekwatathano nokakomitiye ke na sha nokuyambidhidha omayonagulo haga etwa kuushitwe moshitopolwa shaMusati.
“Otwa tseyithilwa kutya aantu mboka ya tembudhwa komukunda Otjihitwa oya pewa omayambidhidho gotango. Naampoka tatu pumbiwa otwa ilongekidha ethimbo kehe,” ta gwedha po ngaaka.
Oya kumagidha oshigwana shaa taaguluke omeya ogendji yo naya kale taya lopota mbala uuna pwa holoka oshiponga.
Omukalimo gwokoRuacana Soini Shikalepo okwa ti okwa limbililwa komvula ndjoka tayi loko ashike paife ihe otayi dhiginine.
“Opo ashike tatu tameke okulonga omapya getu , oshoka inatu kala tatu lokwa, nena iilya yetu otayi hanagulwa po nale komvula,” ta popi ngaaka.
Ta ti, ngeno okwa li omvula tayi fudha po manga iilya yawo yi koke ngeno otaya ka likola iilya nuumvo.