Charles Ndeumane
Epeya ndyoka lya tukukuka molukanda lwoombashu dhoombungu olya thigi omwaalu gwaantu oyendji kaaye na omalukalwa sho lya yaka nokuhanagula po omagumbo ge li 72 moAussenker moshitopolwa sha||Kharas momutenya gwEtiyali.
Opolisi oya kwashilipaleke kutya omulilo ogwa tukuka lwopotundi 16H00 megumbo limwe, ashike molwaashoka okwa li ku na ombepo, omulilo ogwa taandele mbala oku ya komagumbo ge li popepi, naamboka ya li po kaya li taya vulu oku gu dhima.
Opolisi oya li ya longele kumwe naakwashigwana okudhima epeya taya longitha omeya ngoka ya kutha moofaabulika dhomandjembele
Opolisi moshitopolwa sha||Kharas oya ti inaku tseyika kutya omulilo ogwa etithwa koshike, ashike oya koleke kutya inamu ehamena nande omuntu gumwe. Aakalimo yomomagumbo ngoka ga pi po oya kanitha omaliko gawo gongushu oshowo uuthemba noombapila dhilwe dha simana.