Aantu oyendji miitopolwa yokonooli mehuliloshiwike oya thigwa pomutenya sho ombepo onene ya teyagula omatungo, mwa kwatelwa omagumbo, oositola noombelewa.
Kakele kokuteya gula po omatungo, omahala ogendji oga thigwa gaa na olusheno sho oopaala dholusheno nomiti dha li dha fundulwa mo mevi.
Kansela gwoshikandjohogololo Endola, Ferdinand Shifidi okwa ti elago enene oshikungulu shika oshinene “inashi faalela nando omwenyo gomuntu gumwe,” ta pandula ngaaka.
“Otatu kumagidha oshigwana shi indhindhimike pethimbo ndika omanga tatu longekidha shoka tatu vulu okuyambidhidha nasho,” ta ti ngaaka.
Kansela gwoshikandjohogololo Onayena Mateus Nelumbu Kamati okwa koleke onkundana ndjika ta ti ombepo oya thigi aalongwa yoposikola Mateus Nashandi Combined powala sho iipeleki ya gwithwa ko.
“Ombepo yoshikungulu oya halakanitha lela, nonando hasho oshikando shotango, okwa ndhindhilike ndjika ya li onene unene,” ta popi ngaaka.
Kamati okwiindile ishewe oshigwana shi yambidhidhathane pethimbo ndika.
Omupopiliko gwehangano lyokwaandjaneka omalusheno miitopolwa yokonooli (Nored) Lucas Simon okwa ti oya kala nokulopotelwa olusheno talu gu ko miitopolwa yokonooli, ihe shoka osha etwa kombepo ndjoka yoshikungulu ya holoka okuza mehuliloshiwike.
“Ndika ethimbo ewinayi hatu kala twa taalela, oshoka ombepo nomvula onene ohayi piyaganeke omulilo golusheno,’’ ta popi ngaaka.
“Ombepo onene oyo ya hanagula hoka kwa zi olusheno,
otatu kala aluhe tatu kambadhala okulonga meendelelo opo tu shune ko olusheno uuna lwa piyaganekwa, omolwetempelo okugwanitha po omayakulo gookasitoma dhetu,’’ Simon ta popi ngaaka.
“Otandi kumagidha oshigwana kaashi nyenge oopaala dholusheno ndhoka dha teyagulwa kombepo, ihe naye dhi lopote,” ta kumagidha ngaaka.
Simon okwa kwashilipaleke kutya uuna ku na ondhime, oshigwana nashi kale aluhe tashi tseyithile aaniilonga yaNored, opo ku vulwe okuningwa onkambandhala yomeendelelo.
Shekunangela Shivolo gwomomukunda Okaku kaNangula okwa nyenyeta kutya olusheno lwaNored ohalu gu ko olundji. “Thimbo limwe inaku enda ombepo nenge omvula, ihe ihatu tseyithilwa kutya otalu ka ya, ohashi tu uvitha nayi noonkondo, nolundji ohatu lala inaatu lya, oshoka itatu vulu okuteleka,” ta nyenyeta ngaaka.
Ta indile kutya naya lundulule, oshoka otaya ka kanitha iilongithomwa yawo yokomalusheno, oshowo iikulya mbyoka hayi tulwa mookila.
– vkaapanda@nepc.com.na