Aanilonga mehangano lyomakwatathano gopangodhi lyoMTC pamwe nomahangano MVA Fund oshowo Namib Mills okupitila moproyeka yokuyambidhindha oshigwana sha taalela onkalo ondhigu moshilongo, oga yambindhindha osikola Cocoma Primary moshitopolwa shaKavango East nomatalashe 250.
Osikola ndyoka anuwa oya kala ethimbo anuwa yina aalongwa taya lala pevi oshowo komatalashe ga kulupa, go itaga hokitha.
Omahangano ngoka oga manga uukume kumwe opo ya yambindhindhe aalongwa nomatalashe ngoka, sho ga ndhindhilike onkalo ya taalelwa kaalongwa.
Omupitithi gomauyelele mehangano lyoMTC Elisabeth Massamba okwa ti, eyambindhindho lyatya ngaaka, olya gandjwa netompelo lyokuhwepopaleka onkalo yaanona yosikola ya vule okwiitula mo melongo.
“Elongo olya simana, olyina okusimanekwa. Ngele aanona ina ya mona elongo nena onkalamwenyo yawo ohayi kala ya mbwalangandja. Mongashiingeyi ku na mpoka to yi kokule kuu na iipatululo yelongo,” ta popi ngaaka.
Ta ti, MTC ota tsikile okukondjela oshigwana shoka shili mompumbwe, unene oosikola opo dhi mone omayambindhindho dhi wape okugandja elongo ewanawa kaalongwa.
Massamba okwa gwedhapo kutya sho kwali ya ndhingoloka osikola ndyoka oya ndhindhilike kutya osikola oyili natango mombumbwe yoombete dhaalongwa, hoka kuna okutulwa omatalashe.
“Natango otwa ndhindilike wo kutya oosikola oya pumbwa odhalate yolugumbo opo aalongwa ya kale megameno,” ta popi ngaaka.
Omukuluntusikola posikola Cocoma Moses Ndumba okwa pandula omahangano agehe gatatu sho ga yambindhindha osikola nomatalashe oshoka aalongwa ye oya kala lela mompumbwe. “Otandi pandula nomwenyo tagu hambelele oshoka aalongwa posikola mpaka oyo aanelago. Aalongwa ohaya ilongo ya mana mo uuna taya yeli momahala taga hokitha noga yela,” ta popi ngaaka.
Ngoka ali a kalelepo ehangano lyoMVA okwa ti, ohashi nkundipaleke omadhiladhilo gaalongi oshowo aalongwa uuna yeli momahala itaaga hokitha.
“Elongo ohali kala lya pama aluhe ngele omulongi nomulongwa ye uvite nawa, oshowo ombili. Ngaashi naana omahangano ngaka ga yambidhidha nena omolwohokwe nesimano gena nelongo,” ta fatulula ngaaka.
Aalongi naalongwa oya pandula omahangano ngoka gatatu taya ti shoka ga longo osha simana go naga tsikile oku shi ningila oosikola dhilwe moshilongo dhi li mompumbwe.
Ehangano lyoNamWater nalyo olyayambindhindha oosikola 11 niikwathithilongo yongushu yoshimaliwa a ngala shathika N$400 000 moshitopolwa shaHardap.
Oosikola ndhoka dha yambindhindhwa o ngaashi Tsumis Primary, Anna Masdrop Primary, Samuel Veldskoen Primary, Mukurob Prmary, klein Aub Primary, Groendaai Primary, WJD Cloete Primary, JW Mouton primajry, Eduard Frederick Primary, Piet Diergaardt Primary oshowo Nabaseb Primary.
Omunambelewapitithi gwomauyelele omukuluntu Lot Ndamanomhata okwa ti NamWater okwa yambindhindha oosikola ndhoka adhihe 11 omolwo oshisho nohokwe ena nelongo. “NamWater okwa yambindhindha onga oshinakugwanithwa sho progalama ndyoka ya totwa po okuyambindhindha oshikondo shelongo uuna sha taalela omaupyakandhi nenge shili mompumbwe,” ta fatulula ngaaka.
Ngoloneya gwoshitopolwa shaHardap Salomon April okwa pandula sho NamWater sho a dhimbulukwa nokuyambindhindha oosikola moshitopolwoa she.
-vkaapanda@nepc.com.na