OSHAKATI – Amushanga gwokabinete, George Simataa okwa ti omahangano gayama kepangelo naga kale taga longo ga gwanithe omalalakano gepangelo noku waimina omathaneko niilonga yokuyambula po oshigwana.
Simataa ndhika okwe dhi popi komutumba waakuluntuwiliki yomahangano gayama kepangelo tagu ithanwa Public Enterprises CEOs Forum wa li mOshakati oshiwike mehulilo shiwike. Omahangano ngoka geeSOEs oga nyama kepangelo, nopaeveta dhaNamibia, omahangano ngoka ogepangelo, ano oge li omakalelipo gepangelo.
Simataa okwa ti epangelo oku pitila momaumininiteli galyo, oli na oshinakugwanithwa oku gandja omayakulo gontumba koshigwana shaNamibia. Gamwe gomomayakulo ngoka ongaashi elongo, iikwankondo, uuhaku nonkalonawa, egameno, iiyenditho, omeya, nomalukalwa, oku tumbula po owala yimwe po.
Ta gwedha po wo kutya epangelo otali vulu oku gandja omayakulo ngoka, nenge li gandja ompito kooSOE dhalyo odho dhi shi ninge pehala lyepangelo. Kakele kokuyandhindhinda epangelo, Simata okwa ti omalalakano gamwe goku ya po nooSOE ongaashi: oku eta po oompito dhiilonga, oku eta po noku thitika omwaka yomaithano moshilongo, etoto lyoongeshefa niinyagadhalwa yago, oku kaleka po oondando dhili mondjila, oku eta eithikameno, noku longa muuwanawa woshigwana.
Simataa ta ti ooSOE odhi na oshinakugwanithwa oku longelakumwe nepangelo. Oku longa pauhandimwe nomeholeko oku na uumbangi kutya ihaku eta po iiyimati, oku shi talela monakuziwa.
“Osha simana oku koneka kutya aakwashigwana kaye na ko nasha kutya ehangano lini lya longa ondende nenge nuuhasha. Oshigwana ohashi ti owala kutya epangelo olya ndopa, oshoka olyo lya eta opo iikondo yepangelo nooSOE ndhoka itaadhi ete po sha,” ta mana oku popya ngaaka.
-Nampa.