Tauno Iileka
KHOANDAWES – Omahekeb ǀKharisi ǀAwemā!nans di sîsenǂuira mâisas Maria Vaendwanawas ge ge ǂanǂan, ǀawemā!nans ge N$8.5 miljunsa 128 !kharaga ǀhûhâsi projekdi !nâ a ǀgoraǂgāsa ǁîs di ǀhûhâsi omkhâisens prorammi !nâ-ū. ǁÎs ge ge mî, N$8.5 miljuns ge Ministeris Kai!ā tsî !Garo!ā Omkhâisens dis xa a mā-amhe tsî !kharaga !urude xu ūhesa, aiǁgause ǁguiridi tsî hāǀaro rase ra ǀarosen kai ǁguiridi ai maris tsîna xu. Omaheke ǀKharib di hū ǂgiǂgosi ǁhûi!nâǂharidi ge mâs hoasa N$1.2 miljunsa omkhâisens proxrammi !nâ-ū ge !khō!oa, ǁnāpas ǀkharisi ǀawemā!nansa a ǀhawe mâtikō khoen nē projekde xu nî domdoresa ǂgaekhâis ǀkha hîa. ǁHûi!nâǂharidi ge ǁnā aiǂhanuba māhe hâ aitsama ǁîdi ūhâ ǂhâsigu !oagu mîǁguisa mâ projekdi nî marisihuiba māhesa. “Mâ projeks hoas nî !khō!oa maris ge N$10 000 xu N$600 000 hâ. ǁÎs hoan xa a kai maris N$700 000 ge !nanǀgaib !gaeǁaresa Epukiro ǁhûi!nâǂharis hîa Okomumbonde !garo!ā !âb !nâ ǁgoes ǁanǂgāsabena sī-ūbas di, tsî Otjinene ǁhûi!nâǂharis di Ozohambo !garo!ā !âb !aroma N$500 000,” tis ge ge mî. Nē marira ge ǀnai Cenoreds hîa !nanǀgaib !gaeǁarede ra dīsa ge sî!kharubahe. Ai!âs ge Vaendwanawasa ge mî, ǂKhoandawes ǁhûi!nâǂharis ge N$292 000 ǁîs ge ǂnûiǂuibahe marisa xu 15 masinde ge ǁama ǂûna kurus !aroma îs nēs !nâ-ū ǂkharise ra ǂgari ǂgari-aona ûitsamaxūn di ǂûn ǁkhā hui. N$445 000 ge Kalahari ǁhûi!nâǂharis !nâ ǁgamamde !anu!anus tsî ǀasa ǁgamamde khaos !aroma ge ǂnûiǂuihe. Nau hâ projekdi hîa ge noxopa a !gâi!gâdi ge Okurukambe ǁhûi!nâǂharis hîa N$600 000sa ǀgâga !gaos projeks !aroma a !khō!oas, Otjombinde ǁhûi!nâǂharis hîa !nao!haraga Eiseb !âb !nâ oms !aroma N$400 000 ge !khō!oas tsî Aminuis ǁhûi!nâǂharisa N$140 000 !hanaǂgās projeks !aroma. “!Gau ge projekdi ge !kharaga !âgu ǂkhari tsî ǁaegub ǀnōb ǂharuguga omkhâis, ûitsamaxūn ǂgarib, kai xūna !gâi!gâi!nâs, !garo!ā ǂkhari-omn tsî sores ǀgammi ǀkha ra sîsen !nanǀgaib, tsî noxopa ǀnîn !aroma nî sîsenūhe,” tis ge ge mî. Haka skolgu, ǂgaiǀons ai Rietquelle Sekondereb, Izak Buys Sekondereb, Dr Fischer ǂAm Skoli, Aminuis dib tsî C. Heuva Sekondereb hâgu, tsîn ge nē proxramma xu ra domdore ǁnāpa gu omūxūn, kompiterdi tsî ǂhâbasa huisenūxūn ǁkhāǁkhās tsî ǁkhāǁkhāsens !aroma gu ra ǂgann ǀkha ra huihese.