ǀAEǁGAMS – Build Together Proxrammi hîa ge ǁūse a mâba ǁkhawa ûiûi!nâs ases ge Omahekeb ǀKharisi ǀAwemā!nansa mîguiba ge ū, ǁîn nî N$7 miljuns xa !nāsa marisa sîsenūsa tsî ǀnai a dītoasa Build Together Omde !gâ tsî ǀasa omdi tsîna omsa, tib ge ǀawemā!nans senior ǂhaitsi !oabadi mâisab Tauno Iilekaba ǂoago wekheb Fraitaxtsēs ai ge mî. Iilekab ge ge mî, ǀawemā!nans ge nē omde nî ǂnuwise MRBM Namibias omkuruǂnûiǂgāsa a ǁgaumâisa 15 omde Omawejozonjandas Epukiros ǁHûi!nâǂharis !nâ ǂnôas tawa tsî 15 omde Tallismanus hîa Otjombinde ǁHûi!nâǂharis dis !nâ tsî ǀuniga 15 omde Aminuis hîa Aminuis ǁHûi!nâǂharis dis ai. ǂOago wekheb Fraitaxtsēs ais ge ǀawemā!nansa ǂhanusise nē omai!hūde MRBM Namibiasa ge ǁkhaeǁnâ nē omsîsengu ǀkha tsoatsoas !aroma, tib ge Iilekaba ge mî. Nē omdi hîa Omawejozonjandas Epukiros ǁHûi!nâǂharis dis,Tallismanus Otjombinde ǁHûi!nâǂharis dis tsî Aminuis ǁHûi!nâǂharis dis nî omhese i 45di ge ǂâi!nâguihe rasa !oa !oaxa kurib di ǀKhūǁkhâb ai nî dītoahe tsî !gôa!gôahe rasa !oa N$3.7 miljunsa nî !khōǂgā. !Aruǀîb ge Iilekaba ge mî, ǁîn nî ǁaupexa N$1.5 miljunsa sîsenūsa 111 omdi hîa 10 kurigu !kharu hâse ge Build Togethers Proxrammi !nâ-ū !kharaga ǁanǁguigu !nâ Omahekeb a ǂhabase omhe hâ-i tsî nēsi ǀgaisase dī-ūnusa ǂgaohâde dī-ūnu-ūs !aroma. !Aruǀî hâ N$2 miljuns ge n sîsenūhe ǁaupexa disi kurin !kharu hâse nî omhese ge ǀaweǁguihe hâ I 25 asa omde oms !aroma. Iilekab gere mîsa !oab ge Omheke kharib Build Together Proxramma 7 kurigu ǁaeba ǁuse ge mâ I ǀnî khami kō ǁgoaǂuidi x age !aromahese, aiǁgause ǂganǀgaub omkuruxūn dib di ǂharos, !narixūn tsî !khauǁnuib ǂganǀgaub ǂharos, !gôa!gôasa !gôab guib !nâ hâ aiǂhomitoasa omai!hūdi, !nubusib texnise ǂans dis ǀkharisi tsî !ā!nāsi omkuru-aon dis, ǀoro marisa omtsoatsoas !aroma ūhâs tsî ǁaeb ai ǁkhāti naun hîa ǁnā !ereamsa ūhâna xu om-ūǁkhaeb tsî sement-e hōs tsî noxopa ǀnîn.