Auleria Wakudumo
Ongwediva – Omaindilo e li 500, a ningwa keengeshefa odo da hala okukufa ombinga momauliko oipindi aNgwediva (OATF) neudo inaa tambulwa.
Omunashipundi wokakomitiye kokulongekida omauliko oipindi aNgwediva, Rebecca Hidulika okwa holola kutya omaindilo oo inaa tambulwa molwaashi kape na vali eenhele doipindi da wana.
“Onhele yomaulikilo oipindi yaNgwediva oya tungwa nale nonghene oya pumbwa paife okuwedelwa opo elelo li dule okukwashilipaleka kutya ola kwatela mo ovakufimbinga aveshe,” Hidulika ta ti.
Hidulika okwa holola kutya Ongwediva otai dulu ashike okutambula ko ovakufimbinga ve li 485.
Okwa pula opo oohandimwe, ovanangeshefa, omahangano opaumwene osho yo omahangano epangelo a waimine elelo lodoolopa yaNgwediva okuyambula po omaulikilo oipindi.
Naftal Shiweda, umwe womwaavo va ninga omaindilo a shunifwa ko okwa ti okwa ninga eedula nhatu paife ta shunifwa ko kelelo lodoolopa yaNgwediva.
“Neudo onda kala nd ina etimaumbwile kutya pamwe andi ningi ngaho omunelao ndi pite mo, ashike inandi dja mo.
Onda ninga eindilo lokatala kokuyofa ombelela nokulandifa omalodu koKatutura,” Shiweda ta ti.
Shiweda okwa ti ota indile elelo lodoolopa yaNgwediva opo li kale tali yandje eemhito kovanhu aveshe opo va kufe ombinga momaulikilo oipindi.
“Onda didilika kutya ovanhu ile eengeshefa dimwe ohadi pewa omhito keshe kodula omanga pe na ovanhu vamwe tava shunifwa ko oikando ya hanga puitanho,” Shiweda ta ti.
Omaulikilo oipindi aNgwediva okwa mona omaindilo e dule po 1 500 neudo omo omaindilo 485 a tambulwa nomaindilo e dule po500 okwa shunifwa ko.
Ongwediva oya hovela ashike novakufimbinga ve fike pe100 nokudja opo omaulikilo oipindi okwa kala nokuwedelwa kovakufimbinga.
Elelo lodoolopa yaNgwediva ola ongela oshimaliwa shi fike pomiliona N$1.6 kouvalelo wowina wa li ko Olomakaya ponhele yomaulikilo oipindi yaNgwediva.
Ouvalelo owa ningwa nelalakano lokuongela oshimaliwa shokulongifa momaulikilo oipindi aNgwediva (OATF), oo a tengenekwa a ka kale ko momafiku 22 fiyo 30 Aguste neudo.