Uuministeli wiikwameni negameno lyokoongamba owe ya po nomukalo gokuninga omaindilo goombaapila dhomatalelepo “Visa”, tashi ningwa okupitila komalungula. 

Minista gwiikwameni Albert Kawana okwa fatulula kutya Namibia okwe ya po nomukalo ngoka opo a kale e li pondondo yimwe niilongo iikwawo nokutula oshilongo ponkatu yoshinanena osho wo okuhwepopaleka onkalo yAanamibia. 

“Ta ti uuwanawa mboka itau kala ashike kAanamibia, ihe nokaatalelipo oku ya ningila oshipu okuninga omaindilo okutalela po oshilongo shetu, shika natango otashi ka hila aatalelipo oyendji nokukokeka eliko lyoshilongo shetu,” ta fatulula ngaaka. 

Kawana okwa ti, omukalo ngoka otagu tulwa miilonga okuza lyotango lyaApilili nuumvo. 

Ta ti, iilongo 33 mwa kwatelwa Armenia, Australia, Austria, Azerbaijan, Belarus, Belgium, Canada, Denmark, Finland, France, osho wo Germany otayi kala tayi longitha oovisa ndjoka tayi kala tayi kosho ashike N$1,600 (€84). 

“Omukalo nguka otagu kala omuwanawa oshoka oshigwana otashi vulu okuninga omaindilo govisa komalungula omanga inaya thika pehala lyokupitila, shoka tashi kandula po okutegelela pomahala mpoka hapu thikilwa” ta fatulua ngaaka. 

Kawana okwa fatulula kutya omuntu ota kala ta adha ovisa ye ethimbo ta thiki komahala gokuthikila omanene ngaashi kuupale woondhila wopayigwana Hosea Kutako osho wo koWalvis Bay. 

-vkaapanda@nepc.com.na