Nonando epangelo lyaNamibia lya popi kutya konima yomimvo 33 dhemanguluko olya longo oshindji, aagundjuka yamwe oye li ompinge nomupopyo ngoka omanga yamwe taya tsu kumwe nagwo.
Moonkundathana naKundana aanyasha yamwe oya popi kutya kaye na etompelo lyokudhimbulukwa oshowo okutyapula esiku lyemanguluko lyoshilongo ndyoka hali ndhimbulukwa omumvo kehe mo21 yaMaalitsa. Agapitus Andowa ngoka ta landitha otombo momatala gomOutapi okwa ti okwa pandula sho esiku ndyoka lye ya okudhimbulukilwa mOutapi nuumvo, ihe natango oku na omanyenyeto.
“Mokutyapuka esiku ndika, epangelo nali shi ninge lya tala koombinga adhihe. Oomwenyo dhetu odha yemata onkene katu na ohokwe yokutyapula nokudhimbulukwa esiku ndika omolwoompito dhiilonga oshowo omayambidhidho tu tsikile nomailongo getu,” ta nyenyeta ngaaka. Ta ti, ye nomumwayinakadhona oya pita ondondo 12, ihe oonzapo odhi li kohi yookofa oshoka kape na oshimaliwa shoku ya kiiputudhilo yopombanda ya ka tsikile osikola. Ta gwedha po ta ti, epangelo ngeno okwa li tali kala lyi oshinakugwanitha shokuyambidhidha mboka ya taalela oluhepo, ngeno hwepo.
“Ta ti, okwa kambadhala oku indila omayambidhidho okuza koombelewa dhoshikandjohogololo shawo, ihe okwa hulile muunyengwi,” ta ti ngaaka. Omuhingi gwotekisi mOutapi Titus Gotfried okwa ti esiku ndika ote li tyapula ta longo iilonga ye opo a vule okumona omboloto. “Otandi ka kalela okapale ndi mone shike ngame otandi mono nale iihuna? Ondi na onzapo nda pita koshiputundhilo shopombanda Unam, ihe sigo onena kandi na iilonga,” ta ti ngaaka.
Ta gwedha po ta ti ohashi mu sitha uunye okutsikila eilongo lye okwiigwedhela ko oshoka ke wete pe na etompelo.
Ta popi ta ti, ota indile epangelo lyi ya pe iilonga, ihe oya hala ya yambidhidhwe okuya po noshimaliwa shetameko okuninga oongeshefa dhawo yene.
“Tse Aanamibia otu na iitalenti oshowo oonkondo dhokwiilongela tse yene, ihe katu na aayambidhidhi,” ta ti popi ngaaka.
Maria Shatipamba okwa ti esiku ndika ote li dhimbulukwa noku li tyapula omolwombili yi li moshilongo. “Epangelo olya kondja mpoka tali vulu notali tsikile okulongela oshigwana shawo omauwanawa,” ta popi ngaaka. Ta ti, ayihe itayi longwa pethimbo limwe, ohe oyi li mondjila. Ta gwedha po ta ti, onga Aanamibia naya longele kumwe oshowo ya kundathane mpoka ye na okupukulula opo oshilongo shi kale mpoka shi na okukala.
Simon Shileka okwa ti, oshilongo osha manguluka nashooka osho shi na okupandulwa nokusimanekwa.
“Omaudhigu kage na esiku ga hule, oko ge na okukala,” ta ti ngaaka.
– vkaapanda@nepc.com.na