Omafiku 26 omwedi ou kendiki lomaulikilo oipindi kOndangwa otaku kala oshivilo shomakondjifafano eengudu domalwiimbo okudja keengeleka da yooloka. Kape na okatongo kutya ongudu oya dja kongeleka ilipipo, onghee ongudulwiimbo keshe oya manguluka oku ka kufa ombinga.

Eengudu domalwiimbo odo di na ehalo otadi pulwa opo di kale de lishangifa opo di dule okukala da kufa ombinga mekondjifafano eli.

Omuunganeki woshivilo eshi Alex Shiwayu okwa yelifa ta ti eengudu ashike domalwimbo di li monooli da teelelwa okukala da kufa ombinga.

Okwa ti ongudu keshe otai lishangifa noshimaliwa oN$200. “Ei oyo omhito iwa opo eengudu di kale de lishangifa pefimbo omanga omwaalu wengudu inau ninga uhapu,” ta ti. Shiwayu okwa ti oshiwana nashi kwatafane kongodi yaye 0814770815, okupula ouyelele we lixwa po. “Ongudulwimbo otai dulu okulongifa ounongo wavo okwiimba eimbilo pamikalo da yooloka nelalakano lokuhafifa oshiwana osho yo okufindana,” ta ti. Okwa ti ongudu tai findana tete otai ka pewa oshimaliwa oN$5 000 osho yo ekopi. “Ongudu tai findana ponomola onhivali otai pewa oshimaliwa oN$2 500. Omanga tai findana pomola onhi-3 otai pewa oshimaliwa oN1 500,” ta ti. Shiwayu okwa yelifa ta ti ope na ovanhu va hoololwa ovo tava ka longa okuyandja oitwa keengdu tadi ka imba.

“Otapa ka longifwa ouyuuki opo tu kwashipaleke kutya eengudu tadi ka findana oda imba nawa moshili,” ta ti. Okwa pula oshiwana opo shi holoke momwaalu muhapu oku ka pwilikina eengudu domalwiimbo eshi tadi denge ondjimbo.

Oshivilo eshi shomakondjifafano eengudulwimbo otashi ningwa pefimbo lomaulukilo oipindi aNdangwa. Omaulukilo oipindi otaa tameke omafiku 24 Aprili fiyo 02 May.

-fhamalwa@nepc.com.na