I Kae Matundu-Tjiparuro
OTJOMUISE
Omutize wotjihuro o Shakati we ri humburura notjira otjipe ihi o Rally for Democracy and Progress, RDP.
Mehungi re kuna onganda yozombuze indji o Nampa ndapitire mo New Era Oritjaine, Katrina Shimbulu, wa pindikisirwe iyombuze mongorambo ndjipita eyuva arihe mokati kotjiveke otjiveke ihi ndja tjangere kutja eye iumwe wounepo wo Swapo mbumauhakerwa mokuyandja oruvara ko RDP. Mena romahakero inga ena ra Shimbulu otji razemisirwe morutuu rwovahindua kombongarero onene oitjaine yo Swapo okuza kongutukiro ndjimaihaama otjiveke tjimatjiyende.
Shimbulu iumwe wounepo wo Swapo mbwatandua okurambwa motjira mena ro kuhakerwa mokuyandja oruvara ko RDP. Momatjangwa Oritjatatu Petronella Sibeene wo New Era waraisire kutja otjiungura tjotutavi tuo Swapo tjomasisiro nokuramba ounepo mbumauhakwa otjounepo wo RDP matjikayenda komurungu. Orata yo tjihuro tja Tjomeva, Lebbeus Tangeni Tobias nawina omuworonganise wotjirata tjovakazendu tjo Swapo mozondendera za Tjomeva, Rebecca Kalola, Oritjatatu ombaririre ovandu ovape womana ngazemisirwe morutuu rwovahindua kombongarero onene yo Swapo. Omuworongansie wo Swapo morukondua, Armas Amukwiyu, wa yauzire omazemisiro womana wounepo uvari imbwi.”Omena rokutja va tamuninwe notjira otjipe. Katuna ongamburiro muwo,” Amukwiyu watjere. Kalola ngwa kumininwe puna Tobias mo ku pahera o RDP oruvara wapatanene natja eye ngunda okanepo ko Swapo nu kena ondando yo kupita muyo. “Ngaveraisa kutja meyandja oruvara ko RDP. Ami hiyarora kaparukaze okukara morukosi ro RDP.”
Puna Erasmus Hendjala, Kalola na Tobias varirire ovandu vetatu womana ngananununinwe morutuu rwovahindua kombongarero yo Swapo. Oritjavari Petronella Sibeene wina watjangere kutja Orata yOkarukondua kOmatoororero ka Tobias Hainyeko mOkatutura mOtjomuise, Hendjala, Omandaha otja ngundire aa tjayerwa okukara norupa movitjitua vyo Swapo mokuhakerwa kutja ukara morukosi ro RDP rokuhara oruvara. Hendjala wa kumininwe mo kuungurisa ozomburo zo Swapo nawina omasa we otjorata okupopororera o RDP ounepo. Hendjala wa yauzire ko New Era kutja pombongarero omayuva wo masuviro ngazuko okuvareka ovahindua kombongarero onene yo Swapo, pa keere kutja ena re rinanununwe morutuu rovahindua. Hendjala wa patasanisire kutja una orupe no RDP.
Omukambo woku homona mo Swapo kangamwa omundu nguma hakerwa mo RDP, waperwe omasa iyehika ro Swapo romitanda oro tjirakwa kounepo wo Swapo okurihumburura no tjira otjipe otjipirure, o RDP. Omburo mo Swapo ya yauzire kutja otupa atuhe kuwme o 107 okuza motukondua tuehi o 13 tuna otjiungura tjokutara no ku kondonona ena ra kangamwa ngumahakwa okutara mo Swapo.
Orovyungura ndazuko o RDP otji ya tjiukirsirwe kotjiveta pombongarero poruveze rozombonagrero no merinaneno indui rOngutukiro mo Katutura.
Otja komutjange wo New Era, Charles Tjatindi, oruveze indui Orovyungura ndazuko poruveze indui ovandu aaveyatasana otjiwana tji tjavazere okutarera omautiro wotjira ihi. Posyo ombongarero indji kayasanene ingwi kukwazire maisana kutja mairire ombongarero onene nene ndjakarereko mo Namibia okuyenda ketambo rotjimbumba tjitjari peyuva rongutukiro tjinga otja komatjangwa ya Tjatindi apari ovandu ape o 2000 uriri. Ovengi mbari pombongarero indji vatjere veere okuye kuzuva kutja otjira otjipe ihi matjivepe tjike? Varwe tjimuna Adam Rooi okuza kOzorowe weripura rukuru okurikuta kotjira ihi neye weere okuye kuritjangisa. Omukazona Kamama Mbuere wa Katutura momutina wako watjere eye uyenda a maurisiwa iyombepo yopolotika ndjiripo nai nu mamunu kutja omeritjangisiro wo RDP mayeeta omaundjiro omape tjinene nene komitanda.
Catherine Sasman Omandaha watjangere kutja omuhungire weyuva pombongarero ondenga yokotjiveta yomorupnada yo RDP yari ngwari okapenpo ko Swapo mOmbongarero yOtjiwana nu wina rukuru koruseinina ngwari o Ministera yOviposa vyOpendje, Hidipo Hamutenya. “Ete tuakotoka notjivepo nombango okutjita kutja pekare ondanaukiro nokupendura ongamburiro nomaundjiro ngariko ehi tjaa rikutuka,” Hidipo watjere.
Waryamene komurungu natja o RDP katjira tjovandu mbapurukuta mo Swapo posya otjira otjipaturuke kovandu va Namibia avehe vozongamburiro nehi rokongotue ropolotika rawo.
Hamutenya oo Presidenda yopokati kotuveze nu wokehi ye o Steve Bezuidenhout ngunda Jeyaya Nyamu aeri omutjangerepo omunene omutize woruveze. Kandi Nehova Omutjangerepo wOrupa rOmaworonganisiro nOmatuiiro mOmuhunga nu Kauku Hengari Omutjangerepo wOrupa Rondjivisiro. Shapua Kaukungua Omutjangerepo mOrupa rOmakaendisiro wOvyungura nu Michaela Hubschle uri kehi ye. Nicanor Ndjoze otjiuru tjorupa romitanda na Frances Basson kehi ye ngunda kotjiuru tjorupa rovakazendu akuna Agnes Limbo.