ONGWEDIVA – Ovawiliki vopamufyuululwakalo nosho yo ovafita veengeleka ova popya tava ti omakwatonghonga otaa etwa kovanhu tava li oupule molwaashi ova hala okuninga oipuna.
Neudo okwa lopotwa ounona voumati noukadona nosho yo ovakulupe va ninga oihakanwa yokukwatwa onghonga.
Ovalumenhu navo ova ninga oihakanwa yokukwatwa onghonga kovalumenhu vakwao. Ovafitaongalo veengeleka da yooloka navo otaku fekelwa tava kwata ounona onghonga.
Koshitukulwa shaMusati okwa lopotwa omukulupe weedula 104 vati a kwatwa onghonga komutekulu waye weedula 32.
Ounona vavali voumati ova lopotwa va kwatwa onghonga kuxekulu weedula 67.
Ovafita vavali vongeleka yoshiveva ove li modolongo konima eshi va kwata onghonga ndele tava mitike ounona vomongeleka yavo.
Koshitukulwa shaHangwena okwa lopotwa omukulunhufikola nomupolifi va kwata ounona vavo onghonga lwoikando ya yooloka.
Okaana keedula nhatu oka xulifa konima eshi ka kwatwa onghonga komukulupe weedula 88.
Omulumenhu weedula 38 okwa kwata okaana kaye kokamati keedula mbali onghonga pefimbo kwa li va nangala naina kOkongo.
Koshitukulwa shaShikoto okwa lopotwa omukainhu weedula 43 a kwata onghonga okaana kaye kokamati.
Omukwaniilwa welelo laNdonga ota ti:
Omukwaniilwa welelo laNdonga Fillemon Shuumbwa Nangolo okwa ti omulumenhu opo a longe oshimbuluma shekwatonghonga ohe shi ningi e na elalakano.
Okwa weda po ta ti ovanhu ohava kwata ounona ile ovakainhu onghonga ve shi kutya otava ningi shike. “Ovanhu ova hala okuninga oipuna, naashi ohashi eta opo omunhu a ka konge oupule,” ta ti.
Nangolo okwa popya elikwatelela koshikumungu shomukulupe weedula 104 a kwatwa onghonga, omo a hokolola ta ti omulumenhu ou ota li oupule.
“Omunhu u na eedula 32 ashike ou na ehalo lopaixulo nanyokokulu. Osho omunhu a ninga oshiima nelalakano,” ta ti.
Omukwaniilwa okwa ti ovanhu vamwe ohava i keendudu tava ka konga oupule opo eengeshefa davo di xume komesho.
“Omunhu oha dulu okulombwelwa kutya na ka kwate inakulu, okaana kaye onghonga ile a ka nangale nomulumenhu mukwao,” Nangolo ta ti.
Okwa yelifa ta ti ope na omikalo dihapu hadi eta omunhu a longe oshimbuluma shekwatonghonga.
Okwa hokolola ta ti omapata amwe oku na oinima yavo ya nyika oulodi, osho hashi dulu okweeta omunhu a ye moixulo nomupambele waye.
Nangolo okwa kumaida ovakainhu opo va kale va kotoka ngeenge tava fiye ounona voukadona momaumbo ve li nooxe molwaashi ovalumenhu paife ohava kwatwa komhepo yokuya moixulo nounona vavo.
Okwa ti neengeleka doiveva otadi pukifa oshiwana molwaashi ovafita navo ove lininga oikengelela yokukwata ovakainhu onghonga.
Omufitaongalo
Omufita wongeleka Evangelican Baptist Church in Namibia (EBCN) Laban Mwashekele okwa ti elongifo nai lomalodu, ovanhu ve hole omaliko, omunhu ehe na etilokalunga nosho yo ovanhu tava ka konga oupule ohashi eta omunhu a longe oshimbuluma shekwatonghonga ile omulumenhu a nangale novalumenhu vakwao.
Mwashekele naye okwa popya ta ti paife ovanhu otava li oupule molwaashi keshe umwe okwa hala okuninga oshipuna.
Okwa popya e likwatelela kombinga yoshikumungu shomukulunhufikola kofikola i li kOhangwena omo a kwata okaana kaye onghonga ta ti omufekelwa ou okwa ninga oshiima e na elalakano.
Okwa kumaida ovadali opo va kale tava ningile ounona wavo woukadona omapulapulo kombinga ngeenge ova longelwa omunyonena wopaixulo.
“Ovalumenhu otava i moixulo novalumenhu vakwao tava pewa oimaliwa ile tava landelwa eetuwa,” ta ti.
Kombinga ikwao, Mwashekele okwa ti oibofa yomakwatonghonga amwe kai shi yoshili molwaashi omunhu paife oha ka lopotela opolifi konima ngeenge omunhu ina pewa oshimaliwa osho a udanekelwa.
Okwa ti oshiwana nashi longele kumwe okukondjifa omakwatonghonga moshilongo.